Posambaya tau riara kasusa
109
Dade i Daud ka topopalu dade.O Alatala to nitoiyaku,
neꞌe mekalino!
2 Sabana aku nipakajaꞌa ntau najaꞌa bo topebagiu,
ira nangewa aku ante tesa-tesa dawa.
3 Ira nombatesa aku ante wua mata,
bo nangewa aku naupa daꞌa ria saba.
4 Ira nombabata aku nowia najaꞌa,
naupa aku nompotowe bo nomposambaya ira.
5 Ira nombabalasi kabeloku ante powia to najaꞌa,
bo nompowua mata aku naupa aku nompotowe ira.
6 Onggotakamo sambaꞌa topotangara najaꞌa mantangara baliku etu,
pakambamo iꞌa rabata nu balina.
7 Pakambamo iꞌa ratangara bo rapakatantu nasala,
bo posambayana majadi silaka.
8 Pakambamo iꞌa mambuku umuruna,
bo panggana raꞌala ntau ntanina.
9 Pakambamo ana-anana majadi mapailu,
bo rongona majadi mabalu.
10 Pakambamo ana-anana aga menjayo-njayo majadi toperapi-rapi,
bo rapasuma ntau nggari sapona to nagero.
11 Pakambamo topesungara mangala mbara-mbarana,
bo titi nu inina rapangangga tau ntanina.
12 Perapi neꞌe maria tau to maꞌasi mata ri jaꞌina,
bo neꞌe maria tau mompotowe ana-anana to napailu.
13 Pakambamo muli-mulina rapakaropu,
bo sangana mana ratora ri eo nggapurina.
14 Pakambamo silaka ntotuꞌana nggaulu batena ratora i PUE,
bo silaka indona neꞌe rapakalipo.
15 Pakambamo silaka ira batena ratora i PUE,
bo ira mana ratora tau-tau ri dunia.
16 Sabana tau etu daꞌa ntoto nantora nompopokita towena,
tapi nompandasa bo nompatesi tau nasusa bo nakasiasi,
bo tau mana nompakule.
17 Nipokonona nombajanjiaka tau,
pakambamo iꞌa mboto mawela pejanjiakana etu!
Daꞌa nipokonona merapi rasi ka tau,
pakambamo rasi makawao nggari jaꞌina.
18 Pejanjiaka etu nipobiasanamo ewa tau nompasua baju eo-eo,
pakambamo pejanjiaka etu menjisi ewa ue riara korona,
bo mesua sampe ri wuku-wukuna ewa lana.
19 Pakambamo pejanjiaka etu mombabungu iꞌa ewa pakea,
ewa sulepe batena nompoꞌu kopena.
20 O PUE, waimo pesuku etu ka tau to nombabata aku,
bo ka tau to nompakajaꞌa aku.
21 Tapi O Pue ALATALA to nisombaku,
tulungimo aku ala sanga-Mu ratoiya ntau,
pakasalamamo aku sabana kabelo towe-Mu daꞌa ria kaopu-opuna.
22 Sabana aku nakasiasi bo nandasa,
bo nasusa mpuꞌumo raraku.
23 Karoso koroku nalipo ewa wayo ri tempo ngguwiana,
nosaku nalai ewa nggaboro nikaliwu ntau.
24 Wukotuku nolalete sabana napuasa,
bo koroku najadi nadusu nggaꞌu.
25 Aku nisalai bali-baliku;
tempo ira nanggita aku ira nombawiri mata ka aku.
26 O PUE Alatala to nisombaku, tulungimo aku!
Pakasalamamo aku nantuki towe-Mu to daꞌa ria kaopu-opuna,
27 ala ranjani nu baliku etu powia-Mu,
bo Komimo, PUE, to nompowia pura-pura etu.
28 Naupa ira nombajanjiaka aku, Komi kana mombawai rasi ka aku.
Naupa ira mangewa aku, ira kana rapakaeya,
tapi aku, batua-Mu kana madamba-damba.
29 Pakambamo tau-tau to nombabata aku rasalai,
bo maeya mboto matana.
30 Nabete mpuꞌu raraku mosukuru ka i PUE,
aku madota modade mantoiya Iꞌa ri tatongo ntau dea.
31 Sabana Iꞌa nanjaliku tau nakasiasi,
bo nompakasalama ira nggari tau-tau to madota mompakasusa ira.