Posambaya bo posukuru ka i PUE
108
Dade i Daud.2 O Alatala, aku mpuꞌu-mpuꞌu nomparasaya,
aku madota modade bo mantoiya Komi ante mpuꞌu-mpuꞌu raraku.
3 E gambusu bo kacapi, pembangumo!
Aku madota mombalike eo!
4 O PUE, aku madota mosukuru ri jaꞌi-Mu
ri tatongo tau-tau nggari ngata-ngata ntanina,
bo aku madota modade mantoiya Komi
ri tatongo pura-pura manusia.
5 Sabana towe-Mu to daꞌa ria kaopu-opuna neliu nggalanga nggari langi,
bo kabelo-Mu sampe ri kulimu.
6 O Alatala, popokitamo kuasa-Mu neliu nggalanga nggari langi,
bo pakanotomo ri njumaongu dunia Komimo to nakuasa bo nipogumaa.
7 Pakasalamamo kami ante kuasa-Mu, sonomo posambaya kami,
ala tau-tau to nipotowe-Mu makabasaka nggari kasusa.
8 Nggari petoꞌo-Na to nagasa Alatala notesa,
“Aku madota madamba-damba bo mombabagi Tana Sikhem.
Aku madota mombaukuru bo mombabagi Lemba Sukot.
9 To Manasye bo tau netoꞌo ri Tana Gilead todeaku,
to Efraim najadi ewa songgo waja-Ku,
bo to Yehuda najadi ewa lembau to nompakanoto Akumo to nakuasa.
10 Tapi Tana Moab aga petoꞌo powukoꞌi kada-Ku,
Tana Edom petoꞌo pomboli sandalaku,a
bo to Filistin nidagi-Ku sampe aku nongare nadamba-damba.”
11 Sema manggeni aku mpaka ri kota to naria wala pekalendu?
Sema manggeni aku mpaka ri kota Edom etu?
12 O Alatala, mana nipeili-Mu kami?
Mana madota Komi mosanggani ante tantara-tantara kami?
13 Tulungimo kami mangewa bali,
sabana petulungi manusia daꞌa ria gunana.
14 Mosanggani ka Alatala kita maroso mombadagi balita,
Iꞌamo to mombalonggo-longgo bali-balita.