BUKU KAALIMANA
Mazmur 107-150
Dade posukuru ntau nipakasalama nggari kasusa
107
Posukurumo ka i PUE sabana Iꞌa nabelo!Towe-Na daꞌa ria kaopu-opuna!
2 Perapi etu ratesa tau-tau to nipakasalama i PUE,
ira to nikabasaka-Na nggari kasusa.
3 Ira nikeni mpanjili PUEmo nggari ngata-ngata ntanina;
nggari pebuluna bo nggari kasolona,
nggari tasina bo nggari puluna.
4 Naria tau aga nalau-lau ri karawa baina,
daꞌa ninjani ira jala mpaka ri kota to nipetoꞌo ntau.
5 Ira naoro taꞌi bo nabai tambolo,
naopumo rara ira.
6 Riara kasusa ira nekakai ka i PUE,
pade Iꞌa nanggabasaka ira nggari kasusa etu.
7 Nikeni-Na ira nantuki jala to nanoa,
sampe narata ri kota to nipetoꞌo ntau.
8 Masipato ira mosukuru ka i PUE sabana towe-Na to daꞌa ria kaopuna-opuna,
bo powia-powia-Na to nipogumaa manusia.
9 Iꞌa nombawai panginu ka tau to nabai tambolona,
bo nompakagana panggoni to nabelona ka tau to naoro.
10 Naria tau netoꞌo ri karumauna riara ntarunggu,
ira natuwu nandasa nipoꞌu ante rante ase,
11 sabana ira nangewa parenta-parenta Alatala,
bo nanjalai pepatuduki Alatala to Neliu Nggalanga.
12 Jadi Iꞌa nompakasusa tau-tau etu ante pokarajaa ntomo;
ira nadungga tapi daꞌa ria tau nantulungi.
13 Riara kasusa ira nekakai ka i PUE,
pade Iꞌa nanggabasaka ira nggari kasusa etu.
14 Nikeni-Na ira nesuwu nggariara karumauna,
bo nidapa-Na rante-rante ase ira.
15 Masipato ira mosukuru ka i PUE sabana towe-Na to daꞌa ria kaopu-opuna,
bo powia-powia-Na to nipogumaa manusia.
16 Nirege-Na pewobo-pewobo to nipowia nggari tambaga,
bo nigero-Na polawa-polawa pewobo to nipowia nggari ase.
17 Naria tau najadi todoyo sabana nowia silaka,
bo nipandasa sabana kasala-kasala ira.
18 Mana nesua omo ira nanggoni,
mana masae ka ira mamate.
19 Riara kasusa ira nekakai ka i PUE,
pade Iꞌa nanggabasaka ira nggari kasusa etu.
20 Ante tesa-Na Iꞌa nompakalino juꞌa ira,
bo nanggabasaka ira nggari kamatea.
21 Masipato ira mosukuru ka i PUE sabana towe-Na to daꞌa ria kaopu-opuna,
bo powia-powia-Na to nipogumaa manusia.
22 Masipato ira manggeni pesomba posukuru,
bo mompatolele powia-powia-Na ante modade madamba-damba!
23 Naria woꞌu to nesawi sakaya-sakaya bete nantuki jala riara ntasi,
nangelo katuwua riara ntasi to naluo.
24 Ira nanggita powia-powia mpale i PUE,
bo kabaraka-kabaraka-Na ri tasi to nandalana.
25 PUE notesa, pade najadimo poiri naramboso,
to nantawui mpakalanga balumba-balumba.
26 Sakaya-sakaya ira nationggotaka sampe ri laerawa pade nanaꞌu bali ri bunggu ntasi.
Naopumo bia ira nantingayo kasusa etu.
27 Nalilimo mata ira bo nakampei-mpei ewa tau nakalangu,
bo naopumo akala ira nompajala sakaya.
28 Riara kasusa ira nekakai ka i PUE,
pade Iꞌa nanggabasaka ira nggari kasusa etu.
29 Nipopenonto-Na poiri naramboso etu,
pade nalinomo balumba-balumba etu.
30 Nadamba-dambamo ira sabana nenontomo poiri bo balumba,
pade nikeni-Na ira mpaka ri kasampoa to nitunggai ira.
31 Masipato ira mosukuru ka i PUE sabana towe-Na to daꞌa ria kaopu-opuna,
bo powia-powia-Na to nipogumaa manusia.
32 Ira kana mompakabete sanga-Na ri tatongo todea-Na,
bo mantoiya Iꞌa ri ngayo balengga-balengga agama.
33 Binangga-binangga nibali-Na najadi karawa baina,
bo mata-mata ue najadi tana ngau.
34 Tana naboya nipajadi-Na tana mana ria gunana,
sabana kajaꞌa tau-tau to netoꞌo ri saꞌa.
35 Karawa baina nibali-Na najadi polimbo nu ue,
bo tana ngau nipajadi-Na mata nu ue.
36 Nipopetoꞌo-Na tau naoro taina ri saꞌa,
pade ira nombabangu kota rapetoꞌo ira.
37 Ira nosawu ri tinalu bo nowia pampa anggur,
pade nompasiromu aselena to neliu nggadea.
38 PUE nombagane ira sampe ira nantambai kadeana,
bo pompatuwu ira batena nantambai kadeana.
39 Tapi ira nidagi nu bali-bali sampe naboli damo sakedi,
sabana kasusa bo pepandasa to najaꞌa.
40 PUE nompakaeya topanggeniaka-topanggeniaka ira,
bo nipowia-Na ira nenjayo-njayo ri karawa baina to daꞌa ria jala to nantantu ratuki.
41 Tapi tau nakasiasi nikabasaka-Na nggari pepandasa,
bo nipowia-Na mbira-mbira ira nantambai kadeana ewa lunu bimba.
42 Tau-tau nanoa nanggita powia i PUE etu pade nadamba-damba,
tapi tau-tau najaꞌa aga nekalino waꞌamo.
43 Sema-sema to maria notona kana mompariarantaꞌi pura-pura tesa eꞌi,
bo mantondoaka towe i PUE to daꞌa ria kaopu-opuna.