Kabelo i PUE ri jaꞌi todea-Na
106
Ratoiyata i PUE!Posukurumo ri jaꞌi PUE sabana Iꞌa nabelo!
Towe-Na daꞌa ria kaopu-opuna.
2 Daꞌa ria sambaꞌa nompakule mompatolele kakuasa i PUE,
bo mantoiya Iꞌa ante akala to masipatona.
3 Nasana mpuꞌu tau-tau to nantuki parenta-Na,
bo batena nompowia to nanoana.
4 O PUE, toramo aku tempo Komi mompopokita towe-Mu ka todea-Mu,
tulungimo aku tempo Komi mompakasalama ira,
5 ala aku mamala manggita kabelo-Mu ri jaꞌi ntau to nipelisi-Mu,
bo madamba-damba mpasanggani-nggani ante todea-Mu,
bo mosukuru mpasanggani ante tau to nipelisi-Mu mboto.
6 Kami nowia silakamo ewa totuꞌa kami nggaulu,
kami noinggu nasalamo bo najaꞌa.
7 Tempo totuꞌa kami ri Tana Masir
daꞌapa nipaha ira patuju powia-Mu to nabaraka,
daꞌa nitora ira kabete towe-Mu to daꞌa ria kaopu-opuna.
Tapi ira aga nangewa Komi to Neliu Nggakuasa ri wiwi Tasi Lei.a
8 Tapi PUE nompakasalama ira ala sanga-Na ratoiya ntau pura-pura,
bo ranjani ira nabete mpuꞌu kuasa-Na.
9 Niparenta-Na Tasi Lei najadi nangau,
pade nikeni-Na ira nolumako mewote tasi ri tana nabai ewa nolumako ri karawa baina.
10 Ante iwetu ira nipakasalama-Na nggari kuasa tau nawua mata ri jaꞌi ira,
nipakasalama-Na ira nggariara mpale nu bali-bali ira.
11 Ue ntasi nompakatala bali-bali ira,
daꞌa ria kamba sambaꞌa natuwu.
12 Tempo etu niparasaya iramo janji-Na,
pade nodade nantoiya i PUE.b
13 Tapi nasalisa mpuꞌu nikalinga ira powia-Na,
bo mana nanjarumaka pepatuduki-Na.
14 Tempo ri karawa baina ira naino ka panggoni narasa,
pade ri setumo ira nompasuꞌu Alatala nompopokita kuasa-Na.c
15 Niwai-Na ka ira nuapa to niperapi ira,
tapi niwai-Na woꞌu juꞌa mpendai to najaꞌana ka ira.
16 Tempo ira notenda ri karawa baina,
ira nasiriati ka i Musa
bo ka i Harun, batua i PUE to nagasa.d
17 Jadi tana nokanganga nangome i Datan,
pade nangiwu Abiram saongu njapo.
18 Nanaꞌumo apu ri tatongo ira salunu,
bo nompalabu tau-tau nasilaka etu.
19 Ira nompowia parantau ana japi nggari bulawa ri Bulu Horeb,e
ira nombasomba parantau to nipowia nggari bulawa to nigonu.f
20 Ira mana nombasomba Pue Alatala to nakuasa,
tapi aga nombasomba parantau nolenje mpo japi to nangguku kawoko.
21 Nikalinga iramo Alatala to nompakasalama ira,
to nowia mpengele-ngele kabaraka ri Tana Masir,
22 etumo powia-powia nabaraka ri Tana Ham,
bo powia-powia to nipogumaa ri wiwi Tasi Lei.
23 Jadi etumo sabana Alatala nonia mompakaropu todea-Na,
tapi Musa, tau to nipelisi Alatala etu, nantaꞌamaka nia-Na etu.
Iꞌa nantariolo ira sampe nalipo rau rara Alatala,
pade daꞌa najadi Iꞌa nompakaropu ira.
24 Naopu etu ira daꞌa nadota nesua ri Tana Kanaan to nagaya etu,
sabana daꞌa nomparasaya nuapa to nijanji-Na ka ira.g
25 Nongua-nguamo ira riara tenda ira,
bo daꞌa nadota nangepe suara i PUE.
26 Jadi nojanjimo Iꞌa
mompatesi ira ri karawa baina,
27 bo mompalamba muli-muli ira manawu riara mpale tau-tau ntanina,
bo momposipotatare ira ri ngata-ngata ntanina.
28 Naopu etu ira nombasomba wiata Baal ri Bulu Peor,
bo nanggoni bau to nipesomba ka wiata-wiata to daꞌa natuwu.h
29 Powia ira etu nompakajuꞌa rara i PUE,
sampe ira nirata juꞌa mpendai to najaꞌana.
30 Tapi Pinehas narata nombasuku tau to nasala,
jadi nenontomo juꞌa mpendai etu.i
31 Powiana etu nireke powia to nabelona,
bo ratora sampe ri kasae-saena.
32 Todea Israel nompakarau rara i PUE ri mata ue Meribaj,
bo powia ira etu nompakasusa i Musa.
33 Ira nompakagigi rara i Musa,
sampe iꞌa notesa to daꞌa masipato rauli.
34 Ira daꞌa nompakaropu pue ngata ri Tana Kanaan,
ewa to niparenta i PUE ka ira.
35 Tapi ira aga nosigalo ka tau-tau nggari ngata-ngata etu,
bo nompasiala inggu-inggu ira.
36 Ira nombasomba wiata-wiata to nisomba nto Kanaan,
pade etumo to nompakasusa ira mboto.
37 Ira nombawai ana-ana langgai ira najadi pesomba,
bo ana-ana besi ira najadi pesomba ka wiata-wiata Kanaan.k
38 Ira nompatesi tau daꞌa ria salana,
etumo ana-ana langgai bo besi ira,
to nipesomba ka wiata Kanaan,
sampe ngata ira etu natantoru.
39 Ira nompakatantoru koro ira ante powia ira,
bo daꞌa natutu nomparasaya Alatala.
40 Jadi neombamo rau rara Alatala ka todea-Na;
narunggu rara-Na nanggita todea-Na mboto.
41 Niwai-Na ira ka tau-tau nggari ngata ntanina,
sampe ira niparenta tau-tau to nomporau rara ira.
42 Ira nipandasa nu bali-bali ira,
bo nipatundu tau-tau etu.
43 Nadea ngganimo ira nipakasalama i PUE,
tapi ira bate-batena nesapuaka,
sampe ira naropu riara silaka-silaka ira.
44 Tapi PUE nangepe pekakai ira,
Iꞌa nompariarantaꞌi kasusa ira.
45 Nitora-Na pojanji-Na, sabana ira todea-Na.
Naꞌasi mata-Na nanggita ira, sabana nabete mpuꞌu towe-Na to daꞌa ria kaopu-opuna.
46 Iꞌa nompowia ira nipoasi mata
pura-pura tau to nompobatua ira.
47 O PUE, Alatala to nisomba kami, pakasalamamo kami!
Keni mpanjilimo kami nggari ngata-ngata tau ntanina,
ala kami mamala mosukuru bo mantoiya sanga-Mu to nagasa,
bo modade madamba-damba mantoiya Komi.
48 Ratoiyata i PUE, Alatala to nisomba nto Israel,
sampe ri kasae-saena!
Perapi pura-pura todea-Mu manguli, “Nakono!”
Ratoiyata i PUE!