Mantoiya Alatala sabana Iꞌa nompakadupa janji-Na ka Abraham
105
Posukurumo ri jaꞌi PUE, toiyamo sanga-Na,patolelemo powia-Na ka tau-tau ri dunia.
2 Podademo ka i PUE, podademo dade mantoiya Iꞌa,
patolelemo pura-pura powia-Na to nipogumaa!
3 Pakadamba-dambamo mantoiya sanga-Na to nagasa,
pura-pura tau to nepue ka i PUE kana madamba-damba!
4 Perapimo karoso nggari jaꞌi PUE,
bo batena mepue ka Iꞌa!
5-6 Umba komi muli Abraham, batua i PUE,
bo muli Yakub, tau-tau to nipelisi-Na,
toramo powia-powia-Na to nipogumaa,
kabaraka-kabaraka to nipowia-Na bo pesuku-pesuku to nipakatantu-Na.
7 Iꞌamo i PUE, Alatala to nisombata,
Iꞌa nombasuku bali-bali-Na ri njumaongu dunia.
8 Iꞌa batena nantora pojanji-Na,
janji-Na naroo sampe ri kasae-saena.
9 Pojanji-Na etu nipowia-Na ante Abraham,
bo nipakaroso-Na ante nojanji ka Ishak.
10 Nipakaroso-Na woꞌu janji etu ante Yakub,
najadi pojanji sampe ri kasae-saena ante todea Israel.
11 Niuli-Na, “Tana Kanaan kana Kuwai ka iko,
majadi bagiamu sampe ri muli-mulimu.”
12 Tempo ira daꞌapa nadea,
aga sakedi lau, ira najadi topesowo ri tana etu.
13 Ira nolinja-linja nggari ngata to saonguna mpaka ri ngata to santanina,
nggari poparenta to saonguna mpaka ri poparenta to santanina.
14 Daꞌa ria sambaꞌa tau nipalamba i PUE nompandasa ira.
Tempo Iꞌa nombasaliku ira, Iꞌa nompopainga magau-magau iweꞌi:
15 “Neꞌe mompakasusa tau to nipelisi-Ku,
bo neꞌe mowia jaꞌa ka nabi-nabi-Ku!”
16 Iꞌa nompakarata kamateoro ri Tana Kanaan,
bo nompakaropu pura-pura panggoni to nisarumaka.
17 Tapi nipakau-Na sambaꞌa mokolu ka ira,
etumo Yusuf to nipobalu najadi batua.
18 Kadana nibalanggu,
bo tambolona nirante ase.
19 Kaopuna nadupamo nuapa to niboto Yusuf,
tesa i PUE nompakanoto nuapa to niboto Yusuf etu nakono.
20 Magau Masir to nomparenta nadea ngata,
nompakau tau nanggabasaka Yusuf nggariara tarunggu.
21 Yusuf nipakakuasa nombaurusi sapo magau,
bo nipakakuasa ka pura-pura mbara-mbarana,
22 ala mombaꞌaturu pura-pura pangga bete magau,
bo mompatuduki noto ka totuꞌa-totuꞌa ngata.
23 Naopu etu naratamo Yakub to nidae woꞌu Israel ri Tana Masir,
bo netoꞌo ri Tana muli Ham ewa topesowo.a
24 PUE nompowia todea-Na nantambai kadeana,
bo nompowia ira neliu nggaroso nggari pura-pura bali ira.
25 Naopu etu i PUE nombabali rara nto Masir sampe ira nawua mata nanggita todea-Na,
bo ira nombabagiu to Israel to najadi batua-batua-Na.
26 Pade Iꞌa nompakau batua-Na i Musa,
bo i Harun to nipelisi-Na.
27 Ira rombaꞌa nompowia tandai to nipogumaa nggari Alatala ri Tana Masir,
bo kabaraka-kabaraka-Na ri tana muli Ham.
28 PUE nompajadi ngata etu narumau mpika,
tapi tau to Masir nanjapuaka tesa i PUE.
29 Nibali-Na ue ira najadi lei,
bo nipatesi-Na bau-bau ira.
30 Nadea mpuꞌu taraka nesua ri ngata-ngata ira,
bo nesua woꞌu sampe ri sapo magau ira.
31 Nggari parenta i PUE naratamo lale-lale dea,
bo sani-sani ri njumaongu ngata ira.
32 Pade nipakadunggu-Na uja es ka ira,
bo nipakarata-Na kila damo mparea ri ngata ira.
33 Nipakadungga-Na walaa anggur bo kayu ara ira,
bo nidungganaka-Na kayu-kayu ri ngata ira.
34 Nggari parenta-Na naratamo nggaboro nadea mpuꞌu,
daꞌa namala nibila kadeana.
35 Nggaboro etu nanggoni pura-pura tuja-tuja ri ngata ira,
bo nanggoni mpakaopu asele ntana ira.
36 Pade pura-pura ngana langgai ulumbua nipatesi PUE,
ri butu-butu ongu njapo to Masir.
37 Naopu etu nikeni-Na todea Israel nalai nggari Tana Masir,
ante nanggeni salaka bo bulawa.
Ira pura-pura nesuwu ante nasalama.
38 Nadamba rara nto Masir tempo to Israel nalai,
sabana naeka mpuꞌumo rara ira ka tau-tau to Israel.
39 Alatala nombabungu todea-Na ante kulimu,
bo apu nombawanta ira tempo nggawengina.
40 Ira nerapi panggoni, pade niwai-Na ka ira tonji rombo,
bo roti nggari langi sampe ira nabosu.
41 Nibingga-Na watu bete, pade nesuwumo ue,
pade noili ewa binangga ri karawa baina.
42 Pura-pura etu nipowia-Na sabana nitora-Na janji-Na to nagasa
ka batua-Na Abraham.
43 Nikeni-Na todea-Na nalai ante nasana,
tau-tau to nipelisi-Na nesuwu ante nadamba-damba.
44 Niwai-Na ka ira tana tau-tau nggari ngata ntanina,
sampe lenge pue ngata ri setu najadi bagia ntodea-Na.
45 Nipowia-Na iwetu ala todea-Na batena matundu riara Atura-atura-Na,
bo mantuki pura-pura parenta-Na.
Ratoiyata i PUE!