Kabete kuasa i PUE
104
Notesamo aku ka koroku mboto, toiyamo Alatala!O PUE Alatala to nisombaku, Komi to neliu nggakuasa!
Komi nibungu kuasa bo reme ewa pakea to nagaya,
2 Komi nosalibumbu reme ewa tau nosalibumbu buya,
bo Komi nombajini langi ewa tau nompataka tenda.
3 Komi nombabangu sapo-Mu ri baꞌa nu ue,
kulimu nipajadi-Mu kareta to nipesawi-Mu,
to nipajala-Mu ri baꞌa mpoiri.
4 Poiri nipajadi-Mu suro-suro,
bo kila nipajadi-Mu batua-batua-Mu.
5 Dunia nipalo-Mu mpakaroso,
pade daꞌa nogoya sampe ri kasae-saena.
6 Dunia nibungu-Mu ante tasi,
ue ntasi nompakaonga bulu-bulu.
7 Tempo Komi nanggarau, noilimo ue etu;
nangepe suara-Mu to namangga, naramboso mpuꞌu poilina,
8 sampe ri bulu-bulu bo ri lembana,
ri petoꞌo to nipakatantu-Mu ka ue etu.
9 Nipakatantu-Mu pantaꞌana to daꞌa namala raliunaka ue etu,
ala mana mompakalodo dunia.
10 Komi nompajadi mata ue ri lembana,
pade ue etu noili ri tatongo bulu-bulu,
11 najadi panginu pura-pura binata ri karawana,
nompakalino bai tambolo keledai-keledai nggakayu.
12 Ri sinjori ue etu naria tonji-tonji nojumu,
bo nomoni-moni ri olo tawa nggayu.
13 Nggari langi Komi nompakadunggu uja ri bulu-bulu,
pade dunia noasele nggari powia mpale-Mu.
14 Komi nompakatuwu kawoko ka binata,
bo tuja-tuja ka manusia,
ala maria panggoni nggariara ntana,
15 ue anggur to nompakadamba rara manusia,
bo lana zaitun to nompowia lenjena nelana,
bo panggoni to nompakaroso ira.
16 PUE nompakadunggu uja romba ka kayu-kayu,
kayu-kayu bete ri Libanon to nituja-Na mboto.
17 Ri setumo nipojumu nu tonji-tonji,
tonji lupi nojumu ri tuwa kayu etu.
18 Bulu-bulu to nalanga petoꞌo towau-towau nggakayu,
bulu-bulu watu petoꞌo pekalendu walesu nggakayu.
19 Komi nompowia wula ri langi nompakatantu pamulana wula nabou,
bo mata eo nasolo ri tempo to nipakatantu-Mu.
20 Komi nompajadi rumau, pade najadimo nggawengina,
bo tempo etu pura-pura binata raranggayu nenjayo-njayo.
21 Singa-singa to danamuda nongao-ngao ala mombarata sokona,
bo nangelo panggoni nggari jaꞌi Alatala.
22 Ane nebulumo eo, nanjili puramo binata etu,
bo naturu ri petoꞌo pekauluna.
23 Pade nesuwumo manusia nantui pokarajaana,
bo nokarajaa sampe nangguwia.
24 O Pue, nadea mpuꞌu powia-Mu,
pura-pura nipajadi-Mu ante noto,
dunia naponu ante powia-Mu.
25 Kitamo tasi etu, nabete bo naluo petoꞌona,
ante mpengele-ngele bau to daꞌa namala nibila kadeana,
nabelo ka to nabetena nabelo ka to nanggedina.
26 Ri tasi etu nipoliu sakaya-sakaya bete,
bo ri setu woꞌu nomore-more ule bete to nipajadi-Mu to nosanga ka Lewiatan.
27 Pura-pura etu nompopea Komi,
ala rawai ka panggoni ri tempo to nipakatantu.
28 Tempo Komi nombawai panggoni, niala binata-binata etu,
tempo Komi nompakasadia panggoni, ira nanggoni sampe nabasa.
29 Ane Komi mana mompeili ira, natikajamo ira;
ane Komi nangala nosa ira, namatemo ira,
bo nabali najadi sowu.
30 Tapi ane Komi nombawai Nosa-Mu, naria muli-muli to nanjambei ira;
Komi nompajadi binata-binata nabou natuwu ri dunia.
31 Perapi kuasa bo kagaya i PUE maroo sampe ri kasae-saena,
perapi Iꞌa madamba manggita pura-pura powia-Na.
32 Iꞌa nanggita dunia sampe nolalete,
nitui-Na bulu-bulu sampe nesuwumo sumoa.
33 Aku madota modade mantoiya i PUE tempo aku danatuwu,
aku modade mantoiya Alatala sampe ri kaopu katuwuku.
34 Perapi dadeku rapokono i PUE,
sabana Iꞌamo to nompakadamba raraku.
35 Perapi tau-tau nasilaka mana ria ri dunia,
bo tau-tau najaꞌa maropu.
Notesamo aku ka koroku mboto, toiyamo i PUE!
Toiyamo i PUE!