Toiyamo kabelo Alatala
103
Dade i Daud.Notesamo aku ka koroku mboto, toiyamo i PUE!
Notesamo aku riara ntaꞌiku, toiyamo sanga-Na to nagasa!
2 Toiyamo i PUE,
bo neꞌe manggalinga pura-pura kabelo-Na!
3 Iꞌamo to nombaꞌampungi pura-pura kasalamu,
to nompakabelo pura-pura juꞌamu.
4 Iꞌamo to nompakasalama katuwumu nggari kamatea,
bo nombawai ka iko towe to daꞌa ria kaopu-opuna bo asi mata.
5 Iꞌamo to nombawai ka iko anu nabelo to nipodotamu,
sampe iko batena naroso ewa tonji lowe.
6 PUE nompowia to nakono bo nanoa
ka pura-pura tau to nipandasa.
7 Iꞌa nompopanjani nia-Na ka i Musa,
bo nompakanoto powia-powia-Na ka tau to Israel.
8 PUE natowe bo naꞌasi mata-Na,
nandate posabara bo neliu mpuꞌu towe-Na to daꞌa ria kaopu-opuna.
9 Iꞌa mana ntoto mangontiaka kita,
bo daꞌa nomboli rau sampe ri kasae-saena.
10 Iꞌa daꞌa nombasuku kita nantuki kadea silakata,
bo daꞌa nombabalasi kita nantuki kasalata.
11 Tapi ewa kalanga nu langi nggari dunia,
wetumo kabete towe-Na ka tau-tau to nekou ri jaꞌi-Na.
12 Ewa kakawaona nggari pebuluna sampe ri kasolona,
wetu woꞌu kakawaona silakata nitijaka-Na.
13 Ewa sambaꞌa uma nompotowe ana-anana,
wetu woꞌu PUE nompotowe tau-tau to nekou ri jaꞌi-Na.
14 Sabana ninjani-Na iwenu kita nipajadi,
nitora-Na kita eꞌi aga nipajadi nggari tana.
15 Katuwu manusia daꞌa masae nasimbayu ewa kawoko,
ewa bunga nosese ranggawoko.
16 Ane nitawui mpoiri, nalipomo,
pade petoꞌona mana ninjani ntau.
17 Tapi towe i PUE,
daꞌa ria kaopu-opuna ri jaꞌi ntau to nekou ri jaꞌi-Na.
Pade Iꞌa batena nowia to nanoa ka ira,
sampe ri muli nu muli,
18 etumo ka tau-tau to nantuki atura-atura-Na
bo natutu nantuki parenta-Na.
19 PUE noparenta nggari suruga,
Iꞌamo Magau to nomparenta pura-pura to nipajadi-Na.
20 Umba komi malaeka-malaeka, toiyamo i PUE!
Umba komi tadulako-tadulako naroso to nangepe bo nantuki pantesa-Na,
21 umba komi pura-pura tantara-Na,
bo pangga-pangga-Na to nanggawia dota-Na,
toiyamo i PUE!
22 Pura-pura to nipajadi-Na,
toiyamo i PUE ri njumaongu poparenta-Na!
Notesamo aku ka koroku mboto,
toiyamo i PUE!