Posambaya riara kasusa
102
Posambaya tau nasusa, tempo iꞌa nalente bo nekakai nerapi tulungi ka i PUE.2 O PUE, epemo posambayaku,
bo tarimamo pomperapiku ane aku merapi tulungi ri jaꞌi-Mu.
3 Neꞌe rapalasi aku riara kasusa;
petalingamo aku tempo mekakai,
bo sonomo aku masalisa!
4 Sabana katuwuku nasasinta nalipo ewa sumoa,
koroku napane ewa ruti nu apu.
5 Raraku nalente ewa kawoko nalele,
sampe daꞌa ria raraku nanggoni.
6 Koroku naboli damo wukuna,
sabana aku daꞌa nenonto nongua.
7 Aku ewa tonji ri karawa baina,
ewa tonji kalapoa ri petoꞌo to nakalinoa.
8 Aku noturu daꞌa namala napisi,
ewa sambaꞌa tonji ri bunggu nu ata to nipalasi roana.
9 Eo wengi aku nisalai nu bali-baliku,
ira to nompongei aku nombajanjiaka tau ntanina ante nanguli sangaku.
10 Panggoniku aga sowu,
bo panginuku nosigalo ante ue mataku,
11 sabana rau rara-Mu bo gigi rara-Mu ri jaꞌiku.
Aku nitirunaka-Mu ewa rumpu bo nitijaka-Mu.
12 Katuwuku nasalisa naopu ewa wayo nalipo ane nasolomo eo,
bo nalele ewa kawoko.
13 Tapi Komi, O PUE, kana moparenta sampe ri kasae-saena,
bo sanga-Mu matolele sampe ri muli nu muli.
14 Komi mboto kana marata mompotowe Kota Sion,a
sabana naratamo tempona Komi maꞌasi mata ka kota etu.
15 Todea-Mu nompotowe kota etu naupa nagero,
naꞌasi mata ira nanggita kota etu naupa najadi sowu.
16 Tau-tau nggari njumaongu dunia kana maeka ka sanga i PUE,
bo pura-pura magau ri dunia kana mogumaa manggita kuasa bo kagaya-Mu.
17 Etu kana majadi tempo i PUE mombabangu mpanjili Kota Sion,
bo mompopokita koro-Na ante kagaya bo kareme-Na.
18 Iꞌa woꞌu kana mangepe posambaya todea-Na,
bo daꞌa mompoara pomperapi ira.
19 Tulisimo pura-pura eꞌi ka muli nu muli banepiana,
ala tau-tau to daꞌapa niote mantoiya i PUE.
20 Iꞌa nanggita nggari kalangana ri petoꞌo-Na to nagasa.
PUE nompetiro dunia nggari suruga,
21 ala mangepe pekakai ntau to nitarunggu,
bo manggabasaka tau-tau to nipakatantu rapatesi.
22 Ante iwetu sanga i PUE rapatolele ri Kota Sion,
bo Iꞌa ratoiya-toiya ri Kota Yerusalem,
23 tempo tau-tau nggari pura-pura ngata bo poparenta ri dunia
masiromu mpasanggani-nggani mantoiya i PUE.
24 Pue nompakaopu karosoku tempo aku da namuda,
bo nompakambuku umuruku.
25 Nangulimo aku, “O Alatala to nisombaku,
neꞌe mangala nosaku ri tempo karantongo katuwuku!”
PUE, Komi batena maria sampe ri kasae-saena!
26 Tempo nggaulu Komi nompajadi dunia,
bo langi nipowia mpale-Mu.
27 Pura-pura to nipajadi-Mu etu kana maropu, tapi Komi batena maria;
pura-pura etu kana maranta ewa kae.
Etu pura-pura kana rasambei Komi ewa baju,
pade pura-pura etu aga ratijaka.
28 Tapi Komi daꞌa ntoto nabali,
katuwu-Mu daꞌa ria kaopu-opuna.
29 Ana-ana kami todea-Mu kana metoꞌo masana,
bo muli ira pura-pura batena maroo ri jaꞌi-Mu.