Janji sambaꞌa magau
101
Dade i Daud.O PUE, aku madota modade mantoiya kanoa bo towe-Mu to daꞌa ria kaopu-opuna.
O PUE, aku madota mantoiya Komi.
2 Aku madota matuwu ante pokainggu to mabelo.
Nepia Komi marata ri jaꞌiku?
Aku madota matuwu ante rara magasa
riara sapoku.
3 Daꞌa kupakamba anu najaꞌa maria ri jaꞌiku.
Nawua mataku nanggita powia tau nanjapuaka Alatala,
aku daꞌa ntoto mantuki pokainggu ira.
4 Aku daꞌa madota mowia to nadenggona,
bo daꞌa madota mantuki tau mowia kajaꞌana.
5 Tau nompakawau sanga roana nggalino kana kupatesi;
tau nasombo bo nalanga rara kana kupopalai.
6 Nipokonoku tau-tau to natutu nomparasaya Alatala ri Tana Israel;
ira mamala mosanggani ka aku.
Tau to natuwu ante inggu nagasa,
mamala mokarajaa ka aku.
7 Tapi tau topebagiu daꞌa mamala mosanggani ka aku riara njapoku.
Tau topodawa daꞌa rapakulena masae ri ngayoku.
8 Mpadondo-mpadondo kana kupatesi
tau-tau najaꞌa ri Tana Israel;
pura-pura tau to nowia jaꞌa,
kana kupakaropu nggari kota i PUE.