Toiyamo Alatala riara Sapo-Na
100
Dade nipodade tempo to Israel nombawai pesomba posukuru ka Alatala.Umba komi pura-pura manusia ri dunia,
powoomo mpakadamba-damba ri jaꞌi PUE.
2 Pepuemo ka i PUE ante masana rara;
karatamo mantingayo Iꞌa ante modade madamba-damba!
3 Toramo aga i PUEmo Alatala.
Iꞌamo to nompajadi kita, bo kita eꞌi Iꞌamo puena.
Kita eꞌi todea-Na to nipiara-Na ewa bimba nipiara ntopoewu.
4 Pesuamo ri bobaa Sapo-Na ante mosukuru ri jaꞌi-Na.
Karatamo ri lalowo Sapo-Na ante mantoiya Iꞌa;
posukurumo ri jaꞌi-Na bo toiyamo sanga-Na!
5 Sabana i PUE batena nabelo.
Towe-Na naroo sampe ri kasae-saena,
bo Iꞌa namala raparasaya mompakadupa janji-Na sampe ri muli nu muli.