Dade mantoiya Alatala, Magau to nakuasa
99
PUE noparenta ewa Magau;nanggita etu tau-tau nggari pura-pura ngata nolalete.
Iꞌa nekatoko noparenta nggari baꞌa malaeka kerub,a
jadi dunia nogoya!
2 PUE nakuasa ri Kota Sion,b
Iꞌamo to neliu nggakuasa nggari pura-pura manusia ri dunia.
3 Ira kana mantoiya sanga-Na to neliu nggabete bo nipogumaa;
Iꞌamo to neliu nggagasa!
4 PUE, Komimo Magau to narosona to nompotowe atura.
Komi nombawai atura ala tau mamala mowia to nakonona.
Komi nompajala atura ante nanoa
ri tatongo nto Israel.c
5 Toiyamo i PUE Alatala to nisombata,
pekadedemo ri jaꞌi-Na mombasomba Iꞌa.
Iꞌamo to neliu nggagasa!
6 Musa bo i Harun nireke i PUE topanggeniaka agama,
Samuel woꞌu sambaꞌa to nekakai ka Iꞌa.
Ira nekakai ka i PUE,
pade Iꞌa nombasono pekakai ira.
7 Notesamo Iꞌa ka i Musa bo Harun nggariara kulimu,d
pade ira natundu nantuki parenta-parenta bo atura-atura to niwai-Na ka ira.
8 O PUE, Alatala to nisomba kami,
nisono-Mu pomperapi todea-Mu to Israel.
Komimo Alatala to nombaampungi silaka ira,
tapi ira batena nisuku-Mu ane ira nowia to nasalana.
9 Toiyamo i PUE Alatala to nisombata.
Potimbakotumo mombasomba Iꞌa ri Bulu-Na to nagasa,e
sabana neliu nggagasamo i PUE Alatalata!