Pura-pura isi dunia kana mantoiya i PUE
98
Dade mantoiya i PUE.Podademo ka i PUE dade to nabou,
sabana Iꞌa nompowia powia to nipogumaa.
Ante kuasa bo karoso-Na mboto
nidagi-Na bali-bali-Na.
2 Nipopanjani-Na Iꞌamo to nakuasa mompakasalama.
Nipopokita-Na kanoa-Na ka tau-tau nggari pura-pura ngata.
3 Iꞌa batena nompotowe todea-Na to Israel.
Pura-pura tau ri dunia nanggita Alatala to nisombata nompakasalama todea-Na.
4 Umba komi pura-pura tau ri dunia, pongaremo ante madamba-damba!
Podademo mantoiya i PUE ante kadamba rara!
5 Podademo mantoiya i PUE ante mokanda kacapi,
kandamo kacapi ante modade ka Iꞌa!
6 Tawuimo kololio bo parewa musi ntanina,
pongaremo mantoiya i PUE, Magauta!
7 E tasi bo pura-pura isina, popoepemo suaramu to naroꞌona,
waꞌa woꞌu dunia bo pura-pura to netoꞌo riarana.
8 E binangga-binangga, posapa palemo mantoiya i PUE,
ewa tau nosapa pale madamba-damba!
E bulu-bulu, pongaremo ri jaꞌi PUE
ewa tau nongare ante nadamba-damba.
9 Sabana Iꞌa marata ala mantangara dunia ante manoa,
Iꞌa kana mantangara tau-tau nggari pura-pura ngata ante manoa.