Alatala Magau to nakuasa
97
PUE noparenta ewa Magau!Kadambamo topetoꞌo ri dunia,
kadambamo topetoꞌo ri lewuto-lewuto!
2 Iꞌa nibungu kulimunggapu,
poparenta-Na nanoa bo nabelo.
3 Apu to najela-jela nokolu ka Iꞌa,
bo nompalabu bali-bali-Na to naria ri ntalili-Na.
4 Kila-Na nombawanta dunia sampe nareme.
Nanggita etu dunia woꞌu nolalete.
5 Bulu-bulu nagonu ewa lili ri ngayo i PUE,
ri ngayo i Pue to noparenta njumaongu dunia.
6 Langi nompopokita Iꞌa etu nanoa,
bo tau-tau nggari pura-pura ngata nanggita kuasa bo kagaya-Na to nipogumaa.
7 Pura-pura tau to nompakoni pue-pue ntanina kana rapakaeya,
etumo ira to nasombo sabana nepue ka pue-pue ntanina.
Pura-pura wiata etu kana motimbakotu mombasomba i PUE.
8 O PUE, tau-tau ri Kota Sion bo pue ngata ri bagia Yehuda nadamba-damba
nangepe kareba Komi nombasuku bali-bali ira.
9 O PUE, Komimo to noparenta ri njumaongu dunia,
Komi to neliu nibila bo nitoiya nggari pura-pura pue ntanina.
10 Umba komi to nompotowe i PUE,
powua matamo anu to najaꞌa!
Sabana Iꞌa nombajagai katuwu ntau to natutu nomparasaya Iꞌa,
PUE nompakasalama ira nggari kuasa tau najaꞌa.
11 Reme nombawanta tau-tau to nanoa rara,
bo kadamba rara naria ri jaꞌi ntau to nabelo rarana.
12 Umba komi tau to nanoana,
kadambamo sabana powia i PUE riara nggatuwumu!
Posukurumo ri jaꞌi Alatala to nagasa!