Alatala Magau to nakuasa
(1 Tawarikh 16:23-33)
96
Umba komi pura-pura tau ri njumaongu dunia, podademo dade to nabou ka i PUE!Podademo dade ka Iꞌa!
2 Podademo ka i PUE, toiyamo sanga-Na,
patolelemo eo-eo Iꞌamo to nompakasalama kita!
3 Tesamo ka tau nggari pura-pura ngata,
Iꞌamo to neliu nggakuasa bo nagaya!
Pakanotomo ka pura-pura tau ri dunia
powia-powia-Na to nipogumaa!
4 Sabana i PUE neliu nggakuasa bo masipato ratoiya,
Iꞌa kana rabila neliu nggari pura-pura pue ntanina.
5 Pue-pue ntanina daꞌa ntoto ria gunana,
tapi PUEmo to nompajadi langi.
6 Nanotomo Iꞌa neliu nggakuasa bo neliu nggagaya,
Iꞌa neliu nggaroso bo nibila ri petoꞌo-Na to nagasa.
7 Umba komi pura-pura tau ri dunia,
toiyamo i PUE sabana Iꞌa neliu nggagaya bo nakuasa!
8 Toiyamo sanga-Na to neliu nggagaya bo nakuasa,
kenimo pesomba malau mesua ri Sapo-Na!
9 Potimbakotumo mombasomba i PUE
ante mompake pakea mpodade!
Umba komi tau-tau nggari njumaongu dunia, pekoumo komi ri ngayo-Na.
10 Patolelemo ka tau nggari pura-pura ngata,
“PUE noparenta ewa Magau!
Dunia nipakaroso-Na sampe daꞌa nogoya.
Iꞌa kana mombatangara pura-pura tau ante nanoa.”
11 E langi bo dunia, pakadamba-dambamo,
e tasi bo pura-pura isina, pobalumba mpakaroꞌomo,
12 e tuja-tuja ranggarawana, pakadamba-damba puramo.
Pade pura-pura kayu rampangale kana modade madamba-damba ri ngayo i PUE,
13 sabana Iꞌa marata mantangara dunia.
Iꞌa kana mantangara manusia ri dunia ante manoa,
bo mantangara tau nggari pura-pura ngata ante manoa.