Toiyamo i PUE bo pekoumo ri jaꞌi-Na
95
Kamaimo kita mantoiya i PUE ante madamba-damba,kamaimo kita madamba-damba ka i PUE to nanggalendu bo nompakasalama kita.
2 Kamaimo kita mantingayo Iꞌa ante modade bo mosukuru,
bo mantoiya Iꞌa ante dade bo musi.
3 Sabana i PUE etumo Alatala to Neliu Nggabete,
Iꞌa Magau to neliu nggakuasa nggari pura-pura pue ntanina.
4 Iꞌamo to nakuasa ri bagia dunia to nandalana,
bo bunggu-bunggu bulu Iꞌamo puena.
5 Tasi woꞌu Iꞌa puena,
Iꞌamo to nompowiana,
bo kabatana woꞌu powia mpale-Na.
6 Kamaimo kita mesua mombasomba
bo motimbakotu ri ngayo i PUE to nompajadi kita.
7 Sabana Iꞌamo Alatala to nisombata,
bo kita todea to nipiara-Na,
kita ewa bimba to nipoewu-Na.
Ane eo eꞌi komi mangepe suara-Na,
8 neꞌe mompakakoꞌo raramu ewa totuꞌamu nggaulu ri Meriba,a
neꞌe meꞌewa nasimbayu ewa ira ranggarawa baina ri Masa.b
9 Nangulimo i Pue, “Ri setu ira nompesoba Aku,
naupa nikita iramo pura-pura to nikawia-Ku ka ira.
10 Patampulu mpae kasaena
najuꞌa rara-Ku nanggita pokainggu ira.
Niuli-Ku, ira tau-tau daꞌa natundu ri jaꞌi-Ku,
ira daꞌa nantuki parenta-parenta-Ku.
11 Jadi nojanjimo Aku ante rau rara-Ku,
“Ira daꞌa ntoto mesua ri petoꞌo pangosaraka to nipakasadia-Ku ka ira.”c