Alatala nombatangara pura-pura tau
94
O Alatala, Komimo Alatala to nombabalasi kajaꞌana;O PUE, pakanotomo Komimo to mombabalasi powia to najaꞌana.
2 O Topotangara dunia,
waimo pesuku to masipatona ka tau-tau to nalanga rarana.
3 O PUE, sampe nepia?
Sampe nepiamo tau najaꞌa madamba-damba?
4 Ira nombasuwuraka tesa-tesa njilaka,
bo nipodamba ira nowia to najaꞌa.
5 O PUE, ira nompandasa todea-Mu,
bo nompatundu tau-tau to najadi bagia-Mu.
6 Ira nanjambale tobalu besi bo ngana pailu,
bo nompatesi tau topesowo ri Tana Israel.
7 Nangulimo ira, “PUE daꞌa nanggita powiata,
Alatala to nisomba Yakub daꞌa nompariarantaꞌina.”
8 E todoyo ri tatongo ntodea-Ku, pakabelo-belo!
E, komi to daꞌa ria noto, nepiamo komi majadi manoto?
9 PUEmo to nompajadi talinga,
nantantumo Iꞌa kana mangepe.
PUEmo to nompajadi mata,
natantumo Iꞌa kana mekita.
10 Iꞌamo to nompopatora manusia,
natantumo Iꞌa kana mombasuku kita.
Iꞌamo to nompatuduki manusia,
natantumo daꞌa makura pangginjani-Na.
11 PUE nanginjani pura-pura nia manusia,
ninjani-Na nia ira etu daꞌa ntoto ria gunana.
12 O PUE, nasana mpuꞌu tau to nipopatora-Mu,
tau to nipatuduki-Mu ka Atura-atura-Mu.
13 Nipakasana-Mu rarana tempo iꞌa nasusa,
sampe narata tempo tau najaꞌa nombarata pesuku nggari jaꞌi-Mu.
14 PUE daꞌa nompalasi todea-Na,
Iꞌa daꞌa ntoto nompalamba tau to najadi bagia-Na mboto.
15 Topotangara kana motangara woꞌumo ante manoa,
pade pura-pura tau to nanoa kana madamba-damba.
16 Isema to mantulungi aku mantingayo tau-tau najaꞌa?
Isema mosabingga ka aku mangewa tau-tau to nompowia kajaꞌana?
17 Ane rapana PUE daꞌa nantulungi aku,
aku sakedika namate.
18 O PUE, tempo aku nompekiri aku kana manawu,
towe-Mu to daꞌa ria kaopu-opuna nompakaroso aku.
19 Tempo aku nasusa bo nasesa raraku,
Komi nompakasana bo nompakadamba raraku.
20 Daꞌa ntoto masipato topotangara to najaꞌana mosaongu rara ante Komi,
etumo ira to nompowia nia jaꞌa to nangewa atura.
21 Ira nasintuwu mangewa tau to nanoa,
bo mombasuku mate tau to daꞌa nasala.
22 Tapi PUEmo to nanjaliku aku,
Alatala to nisombaku nanggalendu aku.
23 Iꞌa kana mombabalasi ira sabana pokainggu ira to najaꞌa;
Iꞌa kana mompatesi ira sabana ira nowia kajaꞌana.
PUE Alatala to nisombata, kana mompakaropu ira.