Dade nantoiya i PUE
92
Dade nipodade tempo Eo Mpenonto.2 O PUE Alatala to Neliu Nggalanga, nabelo mpuꞌu nosukuru ri jaꞌi Komi,
bo nodade nantoiya sanga-Mu.
3 Nabelo mpuꞌu tempo mpadondona nantesa towe-Mu to daꞌa ria kaopu-opuna,
bo tempo nggawengina nanguli Komi namala raparasaya.
4 Nabelo mpuꞌu nodade ante nokanda koronjo sampulu luina,
nosanggani ante gambusu bo kacapi.
5 O PUE, Komi nompakadamba aku ante powia-Mu,
aku kana modade madamba-damba sabana powia mpale-Mu.
6 O PUE, nabaraka mpuꞌu nuapa to nipowia-Mu;
nakaja mpuꞌu ranjani kami nuapa-nuapa to nipekiri-Mu.
7 Tau nadoyo daꞌa ntoto nanginjani etu,
tau daꞌa ria noto daꞌa namala nompaha.
8 Naupa tau nasilaka natuwu naboya ewa kawoko,
bo tau najaꞌa nantambai nasugi bo nasana,
tapi ira kana rapakaropu sampe ri kasae-saena.
9 Tapi Komi, PUE, nibila bo nitoiya
sampe ri kasae-saena.
10 O PUE, natantumo bali-bali-Mu kana rapakaropu,
natantumo pura-pura tau najaꞌa kana raposimpotatare.
11 Tapi aku nipakaroso-Mu ewa japi palamba,
bo niwai-Mu ka rasi to nadea.
12 Ante mataku mboto aku nanggita bali-baliku nidagi,
ante talingaku aku nangepe tau-tau najaꞌa to nangewa aku nipopalai.
13 Tau nanoa kana mabelo katuwuna ewa sampuꞌu kaluku,
bo matuwu maboya ewa sampuꞌu kayou ri Libanon.a
14 Ira ewa sampuꞌu kayu nituja ri lalowo Sapo Mpepue,
to natuwu naboya ri Sapo Alatala to nisombata.
15 Ira ewa sampuꞌu kayu batena nowua sampe natuꞌa,
bo batena naroso bo naboya.
16 Etumo tandaina nompakanoto i PUE nanoa,
Iꞌamo to nanggalendu aku, Iꞌa daꞌa ntoto nadenggo.