Alatala petoꞌo pekalendu
91
Isema-sema to mekalendu ri jaꞌi Alatala to Neliu Nggalanga,bo mekaulu ri jaꞌi Alatala to Neliu Nggakuasa,
2 kana manguli ka i PUE, “Komimo petoꞌo pekalenduku,
petoꞌoku to naama.
Komimo Alatalaku
to niparasayaku.”
3 Iꞌa kana manggalendu iko nggari nia ntau najaꞌa,
bo nggari juꞌa mpendai to mepakamate.
4 Iꞌa kana mompakaulu iko ewa manu nombaruta anana,
ri wayo nu kapi-Na iko kana mekaulu.
Iꞌa bate-batena nombajagai bo nanggalendu iko,
ewa kaliawo bo wala to naroso nanggalendu tau.
5 Iko daꞌa paraluu maeka ka anu to nompakawiora iko tempo nggawengina,
bara topesuaki tempo eona.
6 Iko daꞌa paraluu maeka ka juꞌa mpenaki to meomba tempo nggawengina,
bara juꞌa mpendai to mompakaropu tempo eona.
7 Nau sanjobu tau mamate ri sinjorimu,
bo sampulu njobu tau mamate ri sabingga ngganamu,
tapi iko daꞌa mokuya-kuya.
8 Iko aga manggita ante matamu mboto,
iwenu Alatala mombasuku tau-tau najaꞌa.
9 PUE etumo petoꞌo pekalendumu,
to Neliu Nggalanga nipajadimu petoꞌo pekaulumu.
10 Jadi iko daꞌa ntoto mawela nuapa-nuapa to najaꞌana,
bo komi saongu njapo daꞌa ntoto mawela kasusa.
11 Malaeka-malaeka-Na kana raparenta-Na mombajagai iko,
ri umba-umba mukalau.
12 Ira kana mantande iko riara mpale ira,
ala kadamu daꞌa mawela watu.
13 Iko mompakule mombatampadu binata to nasoana ewa singa bo ule wuri,
iko kana mompakule mombalonggo-longgo ana singa bo ule sawa.
14 Nangulimo i PUE, “Tau to nompotowe Aku, kana Kupakasalama,
iꞌa kana Kujagai sabana iꞌa nosinjani ante Aku.
15 Ane iꞌa mekakai ka Aku, iꞌa kana Kusono.
Ane iꞌa riara kasusa, iꞌa kana Kuporoa.
Iꞌa kana Kupakasalama,
bo Kuwai ka pebila.
16 Umuruna kana Kupakandate sampe iꞌa mombarasai masana,
pade Kupopokita ka iꞌa, Akumo to nompakasalama iꞌa.”