BUKU KAAMPANA
Mazmur 90-106
Alatala petoꞌo pekalendu manusia
90
Posambaya i Musa, batua Alatala.O Pue, Komimo petoꞌo pekalendu kami,
nompamula tempo nggaulu sampe weꞌi-weꞌi.
2 Daꞌapa bulu-bulu nipowia-Mu,
daꞌapa tana bo dunia nipajadi-Mu,
nggari lamba pamulana sampe ri kasae-saena
Komimo Alatala.
3 Komi nompakatantu manusia kana manjili majadi tana.
Niuli-Mu, “Panjilimo majadi tana ewa ri lamba pamulana.”
4 Riara mpanggita-Mu sanjobu mpae nasimbayu ewa saeo,
nasimbayu ewa kasaena tau nosinjambei nojaga tempo nggawengina.
5 Komi nompakaopu katuwu manusia,
ewa pangipi to nasalisa nalipo,
ewa kawoko dako nosulu.
6 Tempo mpadondona nosulu bo nosese,
tapi nangguwiapa nalelemo.
7 Kami nipakatikaja ante rau rara-Mu,
kami nipakaropu ante belisi rara-Mu.
8 Kasala kami nikita-Mu,
silaka kami to natetabuniaka niwanta nu reme-Mu,
sampe nanoto nikita.
9 Umuru kami nipakambuku sabana rau rara-Mu,
katuwu kami nasalisa naopu ewa nosa nisuupaka.
10 Kasae umuru kami aga pitumpulu mpae,
ane kami maroso walumpulu mpae.
Tapi to nirasai kami aga kasusa bo kapari,
katuwu kami nasalisa naopu pade mana ria kami.
11 Isema to nanginjani kabete rau rara-Mu?
Isema to nanginjani belisi rara-Mu sampe ira naeka ri jaꞌi-Mu?
12 Patudukimo kami ala manginjani katuwu kami aga sampalai lau,
ala kami majadi tau to nanoto.
13 O PUE, sampe nepia Komi marau ka kami?
Poasi matamo batua-batua-Mu eꞌi!
14 Wai ka kamimo towe-Mu to daꞌa ria kaopu-opuna ri tempo mpadondona,
ala kami modade madamba-damba sampe kaopu katuwu.
15 Wai ka kamimo kasana rara,
nasimbayu kasaena ante kasusa to niwai-Mu ka kami,
nasimbayu kasaena ante pepandasa to nirasai kami.
16 Popokitamo powia-Mu ka kami batua-batua-Mu,
bo kuasa-Mu to nabaraka ka muli kami.
17 O Pue Alatala to nisomba kami, poasi matamo kami,
ganemo powia mpale kami,
ganemo powia mpale kami!