Dade tempo nawela pepandasa
89
Dade pepatuduki nggari jaꞌi Etan, to Ezrahi.PUE to Neliu Nggakuasa namala raparasaya
2 O PUE, aku kana modade sampe ri kasae-saena mantesa towe-Mu to daꞌa ria kaopu-opuna,
bo batena mompopanjani ka muli-muliku Komi namala raparasaya.
3 Sabana ninjaniku Komi nompotowe todea-Mu
sampe ri kasae-saena.
Komi batena namala raparasaya
nasimbayu ewa langi batena namala nikita kami.
4 Nangulimo Komi, “Aku nojanji ante tau to nipelisi-Ku,
Aku nojanji ante janji ka batua-Ku i Daud iweꞌi:
5 ‘Aku nompakatantu kana maria mulimu manjambei iko majadi magau,
bo mompajadi poparentamu maroo sampe ri kasae-saena.’ ”
6 O PUE, pura-pura topetoꞌo ri suruga nantoiya powia-Mu to nabaraka;
tempo ira nasiromu, ira nanguli, Komi namala raparasaya.
7 O PUE, daꞌa ria ri langi to nasimbayu ka Komi,
daꞌa ria ri tatongo topetoꞌo ri suruga to nasintoto ka Komi.
8 Komi nibila pura-pura malaeka to nagasa,
Komi nipekou neliu nggari pura-pura topetoꞌo ri suruga to naria ri ntalili-Mu.
9 O PUE Alatala to Neliu Nggakuasa, daꞌa ria to nasimbayu ka Komi.
O PUE, Komi batena namala raparasaya.
10 Komi nompakaoto tasi to daꞌa nenonto nobalumba,
Komi nompopenonto balumba bete.
11 Nipatesi-Mu ule naga riara ntasi to nosanga ka Rahab,
niposimpotatare-Mu bali-bali-Mu ante kuasa-Mu to nabaraka.
12 Langi bo dunia Komi puena,
Komimo to nompajadi dunia ante isina.
13 Pura-pura to naria ri sabingga tasina bo puluna nipajadi-Mu,
Bulu Tabor bo Bulu Hermona nadamba-damba nantoiya Komi.
14 Nabete mpuꞌu kuasa-Mu
neliu mpuꞌu karoso-Mu.
15 Poparenta-Mu nanoa bo nipajala nantuki atura-atura;
powia-Mu nompakanoto Komi batena nompotowe todea-Mu bo namala raparasaya.
16 PUE, nasana mpuꞌu tau to nanginjani mantoiya Komi ante kadamba rara,
to natuwu riara reme-Mu.
17 Njaneo ntua ira nantoiya sanga-Mu,
ira nadamba-damba sabana Komi nanoa.
18 Kami padagi sabana Komi nompakaroso kami,
bo kami nantambai naroso sabana Komi nabelo ri jaꞌi kami.
19 Sabana topanggeniaka kami tau to nipelisi Komi,
magau kami etu nopuꞌu nggari Alatala nto Israel to Neliu Nggagasa.
Pojanji Alatala ka Magau Daud
20 Tempo nggaulu riara saongu panggita,
Komi notesa ka tau to natutu nantuki Komi iweꞌi:
“Nitulungi-Kumo sambaꞌa tadulako,
nipelisi-Kumo sambaꞌa nggari todea nipajadi magau.
21 Nirata-Ku batua-Ku i Daud,
bo nionggota-Ku iꞌa najadi magau
ante nombaboka iꞌa ante lana-Ku to nagasa.
22 Pale-Ku kana mantulungi iꞌa,
bo kuasa-Ku kana mompakaroso iꞌa.
23 Iꞌa daꞌa radagi nu bali-balina,
iꞌa daꞌa rapandasa tau-tau najaꞌa.
24 Pura-pura balina kana Kupakaropu ri ngayona,
isema-sema mompowua mata iꞌa kana Kupatesi.
25 Towe-Ku to daꞌa ria kaopu-opuna kana mosanggani ka iꞌa,
ante kuasa nggari jaꞌi-Ku iꞌa kana mantambai makuasa.
26 Kuwai ka iꞌa kuasa mombakuasai tasi
bo binangga-binangga.
27 Iꞌa kana mekakai ka Aku, ‘Komimo Umaku,
Alatalaku, to kupekalendu bo Topompakasalama aku!’
28 Kana Kuonggotaka iꞌa majadi tau to neliu nibila.b
Iꞌa kana majadi neliu nggakuasa nggari pura-pura magau ri dunia.
29 Kana Kupotowe iꞌa ante towe to daꞌa ria kaopu-opuna,
pojanji-Ku ante iꞌa batena maroso sampe ri kasae-saena.
30 Poparentana kana Kupakaroo nantuki kasaena langi maria,
batena maria mulina majadi magau sampe ri kasae-saena.
31 Tapi ane mulina mombaliunaka Atura-Ku,
bo daꞌa matuwu mantuki parenta-Ku,
32 ane ira daꞌa matundu mantuki pantesa-Ku
bo daꞌa matutu mantuki pepatuduki-Ku,
33 ira kana Kusuku ante poboba sabana silaka ira,
bo Kupawela ka ira pepandasa sabana kasala-kasala ira.
34 Tapi Aku daꞌa menonto mompotowe i Daud,
daꞌa Kupalewa janji-Ku ante iꞌa.
35 Janji-Ku ante iꞌa daꞌa Kuliunaka,
nau aga saongu janji daꞌa Kubali.
36 Sanggani sampe ri kasae-saena nijanji-Ku ante sanga-Ku to nagasa,
Aku daꞌa modawa ka i Daud.
37 Poparentana batena maria nasimbayu ante mata eo,
muli nu mulina batena moparenta sampe ri kasae-saena.
38 Poparentana etu kana maroo sampe ri kasae-saena nasimbayu ewa wula batena naria,
to naroo ri langi nanggita mpengele-ngele.”
Tesa nantangi magau Israel to nidagimo
39 Tapi weꞌi-weꞌi Komi nantijaka bo nompoara magau,
nabelisimo rara-Mu ka tau to nipelisi-Mu.
40 Nipakalipo-Mu pojanji-Mu ante batua-Mu etu,
songgo kamagauna nitijaka-Mu riara sowu.
41 Nidungganaka-Mu tembo-tembo kotana,
petoꞌo pekalenduna nipakagero-Mu.
42 Pura-pura tau to noliu nangago mbara-mbarana,
iꞌa nipongei-ngei tau nosinggamosu ante iꞌa.
43 Nipakaroso-Mu tau-tau to nangewa iꞌa,
nipakadamba-Mu pura-pura balina.
44 Gumana nipakanggulu-Mu,
iꞌa mana nitulungi-Mu riara posibali.
45 Nipakalipo-Mu pura-pura kagayana ewa magau,
iꞌa nipopanaꞌu-Mu nggari pekatoko kamagauna.
46 Nipajadi-Mu iꞌa nasasinta natuꞌa,
iꞌa mpuꞌu-mpuꞌu nipakaeya-Mu.
Posambaya merapi rakabasaka i PUE nggariara kasusa
47 O PUE, sampe nepia Komi metabuni?
Sakuyapa kasaena rau rara-Mu majela-jela ewa apu?
48 Toramo katuwuku ri dunia aga sampalai lau,
manusia to nipajadi-Mu kana mamate.
49 Isema to mamala matuwu bo daꞌa mamate?
Isema mamala mompakasalama korona nggari dayo?
50 O PUE, ri umbamo towe-Mu to nabetena,
to nijanji-Mu ka i Daud sabana Komi namala raparasaya?
51 Toramo, PUE, iwenu aku batua-Mu nisalai,
iwenu aku nombarasai pesalai ntau nggari pura-pura ngata.
52 O PUE, pesalai etu nitesa nu bali-bali-Mu,
ala mombasalai magau to nionggotaka-Mu.
53 Ratoiya i PUE sampe ri kasae-saena!
Amin! Kajadimo iwetu!