Posambaya merapi tulungi tempo nasusa
88
Dade muli Korah ka topopalu dade, nipodade nantuki dade to nosanga ka “Mahalat Leanot.” Dade pepatuduki nggari jaꞌi Heman, tau to Ezrahi.2 O, PUE Alatala to nompakasalama aku,
eo wengi aku nekakai ka Komi.
3 Perapi Komi mantarima posambayaku,
bo pariara ntaꞌimo pekakaiku.
4 Nadea mpuꞌu kasusa to nirasaiku,
aku sakedika namate.
5 Aku nireke ewa tau namatemo damo aga ratana,
mana ntoto ria karosoku.
6 Aku nipalasi ri tatongo ntomate,
ewa tau nipatesi to niboli riara dayo,
ewa tau mana nipeili-Mu,
bo mana ntoto nitulungi-Mu.
7 Aku niboli-Mu riara dayo,
riara lowu to nandala bo narumau.
8 Rau rara-Mu mpuꞌu-mpuꞌu natomo nirasaiku,
aku nipakawela belisi rara-Mu to nadea-dea.
9 Roa-roaku nipakakawao-Mu nggari jaiku,
nipowia-Mu ira narunggu rara nanggita aku.
Aku ewa nitarunggu bo daꞌa namala nalai mpaka ri umba-umba.
10 Mataku nebangga notumangi sabana nasusa rara.
O PUE, butu-butu eo aku nerapi tulungi ka Komi,
bo nosambaya ante nantinande pale.
11 Komi daꞌa ntoto nowia kabaraka ka tau-tau to namatena,
ira daꞌa ntoto nembangu nombatoiya Komi.
12 Daꞌa ntoto nipatolele riara dayo towe-Mu to daꞌa ria kaopu-opuna,
daꞌa ntoto nitesa ri petoꞌo ntomate Komi namala raparasaya.
13 Daꞌa ntoto ria tau riara karumauna
nanginjani powia-Mu to nipogumaa.
Daꞌa ntoto ria tau ri petoꞌo to nikalinga-Mu a
nanginjani powia-Mu to nanoana.
14 Tapi PUE, aku nekakai merapi tulungi ka Komi,
mpadondo-mpadondo pekakaiku narata ri jaꞌi-Mu.
15 O PUE, nokuya Komi nompoara aku?
Nokuya Komi daꞌa nompeili aku?
16 Nggari kakediku aku nipandasa sampe sakedika namate.
Daꞌa ntoto kupakule mantingayo anu nipokaeka to nipowia-Mu.
17 Aku nawela rau rara-Mu to napane-panena,
bo belisi-Mu to nompakawiora raraku.
18 Njaneo ntua aku nawela rau rara-Mu ewa ue nanggabuntu nombarumpa aku,
pura-pura koroku nawela pepandasa nggari jaꞌi-Mu.
19 Wega-wega rapaku nipakakawao-Mu nggari jaꞌi ku,
to najadi roaku weꞌi-weꞌi aga karumauna.