Posambaya merapi tulungi
86
Posambaya i Daud.O PUE, pariara ntaꞌimo aku, bo sonomo posambayaku,
sabana nasusa bo nandasamo aku.
2 Jagaimo katuwuku, sabana aku natutu nantuki Komi,a
pakasalamamo batua-Mu eꞌi to nomparasaya Komi.
3 O Pue, Komimo Alatalaku, poasi matamo aku,
sabana njaneo ntua aku nekakai ka Komi.
4 O Pue, pakadambamo rara batua-Mu,
sabana aga ri jaꞌi-Mu kupekakai.
5 O Pue, Komi nabelo, bo nadota nombaampungi kasalaku.
Komi batena nompotowe pura-pura tau to nekakai ri jaꞌi-Mu.
6 O Pue, petalingamo posambayaku,
bo pariara ntaꞌimo pekakaiku.
7 Tempo aku nombarata kasusa aku nerapi tulungi ri jaꞌi-Mu,
sabana Komi nantarima posambayaku.
8 O Pue, daꞌa ria pue-pue ntanina to nasimbayu ewa Komi,
powia-Mu daꞌa ria kasimbayuna.
9 O Pue, pura-pura tau to nipajadi-Mu
kana marata mombasomba Komi bo mantoiya sanga-Mu.
10 Sabana Komi nakuasa bo nowia kabaraka-kabaraka;
aga Komimo Alatala.
11 O PUE, pakanoto ka akumo jala-Mu,
ala aku matuwu mantuki tesa-Mu to nakonona.
Pakaliongumo rara ntaꞌiku,
ala aku maeka ri jaꞌi-Mu.
12 O Pue Alatalaku, aku kana mosukuru ri jaꞌi-Mu ante mpuꞌu-mpuꞌu raraku,
bo mombatoiya sanga-Mu sampe ri kasae-saena.
13 Sabana nabete mpuꞌu towe-Mu to daꞌa ria kaopu-opuna ri jaꞌiku,
bo Komi nanggabasaka aku nggari kamatea.
14 O Alatala, tau-tau to nalanga rarana narata mangewa aku,
bo tau-tau to nasombo madota mompatesi aku.
Ira daꞌa nombabila Komi.
15 Tapi O Pue, nabete mpuꞌu towe bo asi mata-Mu,
nandate mpuꞌu posabara-Mu,
towe-Mu daꞌa ria kaopu-opuna. Komi batena namala raparasaya.
16 Pariara ntaꞌimo bo poasi matamo aku,
waimo karoso-Mu ka batua-Mu eꞌi,
bo pakasalamamo aku, ana nggari batua-Mu besi.
17 O PUE, popokita ka akumo tandai kabelo-Mu,
ala tau-tau to nowua mata ri jaꞌiku maeya mboto matana,
tempo ira manggita Komi mantulungi bo mompakawoe raraku.