Posambaya merapi kabelo Tana Israel
85
Dade muli Korah ka topopalu dade.2 O PUE, tana eꞌi nipokono-Mu,
bo tau-tau to Israel nipakabelo-Mu bali.
3 Niampungi-Mu kasala ntodea-Mu,
bo nipakalipo-Mu pura-pura silaka ira.
4 Komi mana nanggarau ira,
bo mana nompopokita belisi rara-Mu ka ira.
5 O Alatala, Topompakasalama kami, pakabelo balimo katuwu kami ewa bopia,
neꞌe mana manggarau kami.
6 Damaraupa Komi ka kami sampe ri kasae-saena?
Damobelisipa rara-Mu sampe ri muli nu muli?
7 Pakabelo balimo katuwu kami,
ala kami madamba-damba mantoiya powia-Mu.
8 O PUE, pakanotomo ka kami towe-Mu to daꞌa ria kaopu-opuna,
bo pakasalamamo kami!
9 Weꞌi-weꞌi aku madota mangepe nuapa to ratesa i PUE Alatala.
Iꞌa kana mojanji mombawai katuwu nasana ka kita todea-Na,
to natundu ri jai-Na.
Aga neꞌe mana kita mowia silaka.
10 Natantumo Iꞌa kana mompakasalama tau-tau to nombabila Iꞌa,
ala kuasa bo kagaya-Na matekita ri tatongo ngatata.
11 Alatala batena nompopokita towe-Na to daꞌa ria kaopu-opuna,
pade bate-batena namala raparasaya.
Iꞌa notangara ante nanoa,
bo nombawai katuwu nasana ka todea-Na.
12 Katutu to Israel nomparasaya natekita ri dunia,
bo kanoa Alatala notangara to Israel nopuꞌu nggari suruga.
13 Natantumo i PUE kana mombawai tana to nabelona,
pade tana etu kana mombawai asele mabelo.
14 Kanoa Alatala nokolu ka Iꞌa,
ala mompakasadia jala ka Iꞌa.