Nalentora ka Sapo Mpepue
84
Dade muli Korah ka topopalu dade. Nipodade nantuki dade to nosanga ka “Gitit.” Dade nombatoiya Alatala.2 O PUE to Neliu Nggakuasa,
nagaya mpuꞌu petoꞌo-Mu.
3 Nalentora mpuꞌu raraku ka Sapo-Mu,
pura-pura koro bataku nadamba-damba ka Alatala to natuwuna.
4 Nau tonji rone nombarata petoꞌo,
bo tonji walinayo nombarata jumu
rapomboli ana-anana,
namosu meja mpesomba-Mu.
O PUE to Neliu Nggakuasa,
O Magauku, Alatalaku,
5 nasana mpuꞌu tau to netoꞌo ri Sapo-Mu,
to daꞌa nenonto-nonto nantoiya Komi.
6 Nasana mpuꞌu tau to nombarata karoso nggari jaꞌi-Mu,
bo nalentora rara malau mombasomba Komi ri Bulu Sion.
7 Tempo ira noliu ri Lemba Baka to nangau,
petoꞌo etu najadi petoꞌo to naria mata ue,
pade uja pamulana woꞌu nanggeni rasi to nadea ka petoꞌo etu.
8 Nantambai kasaena ira nolumako nantambai karoso ira,
sampe narata nantingayo Alatala ri Bulu Sion.
9 O PUE Alatala to Neliu Nggakuasa, epemo posambayaku!
O Alatala to nisomba Yakub, petalingamo aku!
10 O Alatala, pariara ntaꞌimo magau kami to nasimbayu ewa kaliawo,
waimo rasi ka magau to nionggotaka-Mu!
11 Neliu nggabelopa saeo maroo ri Sapo-Mu,
pade sanjobu eona ri petoꞌo ntanina.
Nipokonokupa majadi topojaga ri pewobo Sapo Alatalaku,
pade maroo ri sapo-sapo tau najaꞌa.
12 Sabana PUE Alatala to nanggeniaka bo nanggalendu kita.
Iꞌa nompotowe bo nombabila kita,
Iꞌa batena nowia belo ka tau to nanoa pokaingguna.
13 O PUE to Neliu Nggakuasa,
nasana mpuꞌu tau to nomparasaya Komi!