Posambaya merapi tulungi ka Alatala mangewa bali-bali to Israel
83
Dade Asaf.2 O Alatala, neꞌe aga mekalino mboto,
neꞌe aga mompunggu pale!
O Alatala, neꞌe wetu Komi!
3 Kitamo! Nagadomo bali-bali-Mu,
tau-tau to nompowua mata Komi neewa.
4 Ira nasintuwu nowia akala to najaꞌana mangewa todea-Mu,
ira nolibu nowia nia mangewa tau-tau to nikalendu-Mu.
5 Nangulimo ira, “Kamaimo kita mompakaropu to Israel,
ala sanga ira mana ratora ntau!”
6 Ira nolibu ante nosaongu rara,
nasintuwu mangewa Komi.
7 Ira todea nggari Tana Edom bo muli Ismael,
todea nggari Tana Moab bo tau to Hagar,a
8 to Gebal, to Amon bo to Amalek,
to Filistin ante todea ngata Tirus.
9 Bo to Asyur woꞌu nosigalo ka ira
nantulungi to Moab bo to Amon, muli-muli Lot.b
10 Powiamo ka ira ewa to nipowia-Mu tempo nggaulu ka to Midian,c
ewa nipowia-Mu ka i Sisera, bo Yabind namosu Binangga Kison,
11 to nipatesi ri kota En-Dor,
pade watabaku ira napopo nompakaboya tana.
12 Patesimo pura-pura tadulako ira ewa to nipowia ka Oreb bo i Zeeb,e
pakamatemo topanggeniaka ira ewa i Zebah bo i Salmuna.f
13 Sabana ira nanguli, “Kamaimo kita mangala tana Alatala
majadi bagiata.”
14 O Alatala, kamburakamo ira ewa sowu,
nasimbayu ewa kuli mpae to nitawui mpoiri.
15 Ewa apu to nompakapapu pangale,
bo ewa jela nu apu nompakaboa bulu-bulu,
16 ragamo ira ante poiri bete-Mu,
bo pakatikajamo ira ante tambusisi-Mu!
17 O PUE, palambamo ira rasalai,
ala ira mompangaku Komimo to nakuasa!
18 Palambamo ira rapakaeya bo rapareka sampe ri kasae-saena!
Palambamo ira mamate ante eya mata!
19 Palambamo ira manginjani aga Komimo i PUE,
to Neliu Nggalanga to nombakuasai njumaongu dunia.