Alatala Nombatangara Malaeka-malaeka to Nasalanjalamo
82
Dade Asaf.Alatala nanggeniaka polibu ri suruga,
Iꞌa najadi topotangara ri tatongo malaeka-malaeka to nasalanjalamo.
2 Niuli-Na ka ira, “Neꞌe mana motangara ante madenggo,
bo neꞌe mosabingga ka tau najaꞌa.
3 Salikumo ngana pailu bo tau nalente;
kalendumo tau to nandasa bo nakasiasi.
4 Tulungimo tau to napakasi, to daꞌa ria nuapa-nuapana;
kabasakamo ira nggariara mpale tau najaꞌa.
5 Komi nabodo bo nadoyo, nasalanjalamo komi!
Sabana etu nageromo atura-atura ntodea ri dunia!
6 Nangulimo Aku: Komimo, malaeka-malaeka,
komi pura-pura ana-ana nggari Pue Alatala to Neliu Nggalanga.
7 Tapi komi kana mamate ewa manusia to daꞌa natuwu mpeliu;
katuwu komi kana maria kaopuna nasimbayu ewa katuwu pura-pura topoparenta.”
8 O Alatala, karatamo mantangara dunia,
sabana todea nggari pura-pura ngata Komimo puena.