Posambaya tempo posusa agama
81
Dade Asaf ka topopalu dade. Nipodade nantuki dade to nosanga ka “Gitit.”2 Podademo dade ka Alatala to nompakaroso kita!
Pongaremo ante madamba-damba ka Alatala to nisomba i Yakub!
3 Podademo dade ante mokanda rabana,
kandamo kacapi bo gambusu ante onina to nabelo!
4 Tawuimo kololio ri tempo wula nggiki,
bo tempo wula dongga,
etumo ri eo beteta!
5 Kawiamo pura-pura etu,
sabana etumo to nipakatantu
najadi sangele atura Alatala to nisomba Yakub.
6 Atura etu nipakatantu-Na najadi pepotora ka tau to Israel,
tempo Iꞌa nalau nangewa tau to Masir.a
Aku nangepe tesa Ntau to daꞌa niposinjaniku. Iꞌa nanguli,
7 “Niala-Ku puramo panggeni ntomo nggari wingamu,
bo komi nikabasaka-Ku nggari pepatundu.b
8 Riara kasusa komi nekakai,
pade Aku nompakasalama komi.
Nisono-Ku komi nggariara kulimunggapu, petoꞌo nu guntu,
niuji-Ku komi ri ue Meriba.c
9 Umba komi todea-Ku, epemo pepatora-Ku!
Umba komi to Israel, nisarumaka-Ku komi madota mangepe Aku!
10 Neꞌe komi mepue ka pue-pue ntanina,
neꞌe mekadede mombasomba ira.
11 Akumo PUE Alatala komi,
to nanggeni komi nalai nggari Tana Masir.
Pakasadia-diamo komi mantarima rasi nggari jaꞌi-Ku,
pade Aku kana mombawai nuapa-nuapa to niparaluu komi.
12 Tapi todea-Ku daꞌa nadota nangepe nuapa to niuli-Ku ka ira,
to Israel daꞌa nadota nekou ri jaꞌi-Ku.
13 Sabana etu nipalamba-Kumo ira nakoꞌo rara,
ira aga nantuki dota ira mboto.
14 Ane rapana todea-Ku madota mangepe Aku,
ane to Israel matuwu mantuki dota-Ku,
15 tempo etu woꞌu kana Kupowia bali-bali ira mekou ri jaꞌi ira,
bo Kudagi tau-tau to nangewa ira.
16 Tau-tau to nawua mata ri jaꞌi-Ku kana mekou ri jaꞌi-Ku,
ira kana Kusuku sampe ri kasae-saena.
17 Tapi todea-Ku kana Kuwai ka gando to neliu nggabelona,
bo Kupakabasa ira ante ue wani nggari buluna.”