Posambaya ala todea nu Alatala rapakasalama
80
Dade Asaf ka topopalu dade. Nipodade nantuki dade to nosanga ka “Bunga Bakung.” Dade posabi.2 O Pue, Topoewu to Israel, epemo pekakai kami!
Komi to nanggeniaka muli Yusuf ewa topoewu nompoewu bimba.
Komi to netoꞌo ri baꞌa malaeka-malaeka kerub,a
karatamo ante reme.
3 Ri ngayo suku Efraim, suku Benyamin bo suku Manasye,
popokitamo kuasa-Mu bo karatamo mompakasalama kami!
4 O Alatala, pakaroso balimo kami ewa bopia,
perapi reme nggari jaꞌi-Mu mombawanta kami ala kami masalama.
5 O PUE Alatala to Neliu Nggakuasa,
sakuyapa kasaena Komi marau ka todea-Mu,
naupa kami nekakai ka Komi?
6 Komi nompowia kami notumangi njuꞌu,
bo nompakadea ue mata kami nesuwu.
7 Nipalamba-Mu tau-tau to netoꞌo nosinggamosu ka kami
nosinggarau nosiago ka tana kami,
bo bali-bali kami nompongei-ngei kami.
8 O Alatala to Neliu Nggakuasa, pakaroso balimo kami ewa bopia,
perapi reme nggari jaꞌi-Mu mombawanta kami ala kami masalama.
9 Tau-tau to Israel nirapaka ewa walaa anggur
to nikeni-Mu nggari Tana Masir.
Todea nggari ngata-ngata ntanina nipopalai-Mu,
pade walaa anggur etu nituja-Mu ri tana ira.
10 Nipakasadia-Mu pampa ka walaa etu,
pade kalena nantambai nandala,
bo walaa etu nendele nompakaomu tana etu.
11 Walaa etu nompakaomu pura-pura Tana Kanaan,
bulu-bulu ri sabingga puluna nibungu walaa etu,
sampe narata ri bagia Libanon sabingga tasina.b
12 Walaa-walaana nendele sampe ri Tasi Tongo,
bo lolona sampe ri Binangga Efrat.
13 O Alatala, nokuya Komi nombagero walana,
sampe isema-sema to noliu namala mangala wuana?
14 Wawu nggakayu nanggiki walaa etu sampe nadapa,
bo binata naila nangguku tawana.
15 O Alatala to Neliu Nggakuasa,
patinggulimo ri jaꞌi todea-Mu!
Petiromo kami nggari suruga,
bo pariara ntaꞌimo kami to nasimbayu ewa walaa anggur etu.
16 Tulungimo todea-Mu to nipopetoꞌo-Mu ri tana eꞌi,
to nipowia-Mu mboto najadi todea to naroso.
17 Bali kami nompalabu bo nombatowo walaa anggur etu;
perapi ira maropu mawela rau rara-Mu.
18 Tapi perapi Komi manggalendu tau-tau to nipelisi-Mu,
etumo manusia to nipakaroso-Mu najadi bagia-Mu mboto.
19 Ante iwetu kami mana mokanggaura nggari jaꞌi-Mu.
Keniakamo katuwu kami, pade kami kana mantoiya sanga-Mu.
20 O PUE Alatala to Neliu Nggakuasa, pakaroso balimo kami ewa bopia,
perapi reme nggari jaꞌi-Mu mombawanta kami ala kami masalama!