Posambaya merapi ala rakabasaka nggari tau-tau najaꞌa
79
Dade Asaf.O Alatala, todea nggari ngata-ngata ntanina narata nesua ri Tana-Mu.
Ira nompakatantoru Sapo-Mu to nagasa,
bo nompakagero Kota Yerusalem.
2 Watabaku batua-batua-Mu niwai ira ka tonji-tonji ri laerawa,
watabaku ntau natundu ri jaꞌi-Mu nipakoni ira ka binata-binata nggakayu.
3 Riara Kota Yerusalem, nisambale ira todea-Mu,
sampe lei tau namate noili ewa ue,
pade daꞌa ria tau nombatana watabaku ira.
4 Kami nisalai todea nggari ngata-ngata ri sinjori kami,
ira nombatege bo nompongei-ngei kami.
5 O PUE, sampe nepia Komi marau ka kami? Sampe ri kasae-saena?
Sampe ri kasae-kasaena rau rara-Mu majela ewa apu?
6 Suwurakamo rau rara-Mu ka tau-tau to daꞌa nomparasaya Komi,
bo todea nggari ngata-ngata to daꞌa nepue ka Komi.
7 Sabana ira nompatesi kami todea-Mu,a
bo nompakagero ngata to nipetoꞌo kami.
8 Neꞌe rapawela ka kami silaka ntotuꞌa kami.
Poasi matamo kami sabana mana ria panjarumaka kami.
9 O Alatala, Topompakasalama kami, tulungimo kami
ala sanga-Mu rapakabete.
Kabasakamo kami bo ampungimo silaka kami,
ala sanga-Mu mpuꞌu-mpuꞌu rabila ntau.
10 Nokuya tau-tau ri dunia nompongei kami bo nanguli,
“Ri umbamo weꞌi Alatala to Israel?”
O PUE, palogamo kami manggita Komi mombabalasi
tau-tau to nompatesi todea-Mu.
11 Pariara ntaꞌimo pekakai tau-tau nitarunggu,
perapi tau-tau to rasuku mamate
rapakasalama ante kuasa-Mu.
12 O Pue, balasimo kajaꞌa ntodea nggari ngata-ngata ri sinjori kami,
pitunggani kadeana nggari powia ira nanjalai Komi.
13 Ante iwetu kami todea-Mu,
to nirapaka ewa bimba-bimba to nipiara-Mu,
kana mosukuru ri jaꞌi-Mu sampe ri kasae-saena,
bo mantoiya Komi sampe ri muli nu muli kami.