Alatala nanggeniaka todea-Na naupa ira daꞌa natutu nantuki Iꞌa
78
Dade pepatuduki Asaf.Umba komi todeaku, epemo pepatudukiku,
pariara ntaꞌimo nuapa to kuuli ka komi.
2 Aku kana motesa mompasimbayu porapa,
bo mompakanoto tesa-tesa to nitabuniaka tempo nggaulu,
3 to niepe bo ninjani kami,
bo nitesa ntotuꞌa ka kami.
4 Kami daꞌa mantabuniaka tesa etu ka ana-ana kami.
Tapi kana rapopanjani kami ka muli-muli kami nggapurina
powia i PUE to masipato ratoiya,
kuasa-Na bo powia-powia-Na to nipogumaa.
5 Iꞌa nompakatantu pepatuduki bo Atura-Na ka tau to Israel,
bo niparenta-Na ka totuꞌata nggaulu ala rapopanjani ka ana-ana ira,
6 sampe ranjani muli ira nggapurina,
etumo muli-muli to daꞌapa nesuwu.
Pade muli ira etu woꞌu kana mompopanjani ka muli ira nggapurina.
7 Ante wetu muli ira woꞌu kana metidombo ri jaꞌi Alatala,
bo daꞌa manggalinga powia-powia-Na,
tapi bate-batena mantuki parenta-Na.
8 Ira daꞌa ntoto mantuki pokainggu totuꞌa-totuꞌa ira nggaulu,
to daꞌa natundu bo nesapuaka,
to daꞌa naroso pomparasaya ira ri jaꞌi Alatala,
bo daꞌa natutu nantuki Iꞌa.
9 Naupa tantara suku Efraim nagana parewa mposibalina,
tapi ira aga nangowa nalai tempo nosibali.
10 Ira nompalewa pojanji ira ante Alatala,
daꞌa nadota ira mantuki Atura-atura-Na.
11 Nikalinga iramo nuapa to nipowia Alatala,
bo powia-powia to nipogumaa to nipopokita-Na ka ira.
12 Ri ngayo totuꞌa-totuꞌa ira,
Alatala nompowia mpengele-ngele kabaraka ri Tana Masir ri Bagia Zoan.a
13 Iꞌa nombabingga tasi pade nanggeni ira mewote,
tasi etu nipajadi-Na ewa tembo ntimali-mali.
14 Tempo eona nikeniaka-Na ira ante kulimu,
bo njambengi ntua ira nikeniaka-Na ante reme nu apu.
15 Nibingga-Na bulu watu ri karawa baina,
bo niwai-Na ka ira ue inu to neliu nggadea.
16 Nipopesuwu-Na ue etu nggari bulu watu,
pade nipopoili-Na ewa binangga.
17 Tapi ira daꞌa nenonto-nonto nowia silaka ri jaꞌi-Na,
ante nangewa Alatala to Neliu Nggalanga ri karawa baina.
18 Nitunggai ira nompesoba Alatala
ante nomperapi panggoni nantuki dota ira mboto.
19 Niewa ira Alatala ante nanguli,
“Daꞌa rapakule Alatala mompakasadia panggoni ka kita ri karawa baina.
20 Nakono niboba-Na bulu watu
sampe nesuwumo ue bo noili najadi ue bete.
Tapi rapakule-Na woꞌu mombawai roti?
Rapakule-Na mompakasadia bau ka todea-Na?”
21 Nangepe etu napanemo rara i PUE.
Nipakarata-Na apu nompalabu muli Yakub,
nisuwuraka-Na rau rara-Na ka tau to Israel,
22 sabana ira daꞌa nomparasaya Alatala,
bo daꞌa nanjarumaka kuasa-Na nompakasalama ira.
23 Naupa iwetu niparenta-Na kulimu-kulimu,
bo nibea-Na pewobo-pewobo ri langi.
24 Nikamburaka-Na mannab to nadeana najadi panggoni ira,
niwai-Na ka ira gando nggari suruga.
25 Ira nanggoni panggoni malaeka,
niwai-Na ka ira panggoni to neliu nggadea.
26 Nipopeburu-Na poiri nggari pebuluna,
bo nitumba-Na poiri bete nggari puluna ante kuasa-Na.
27 Nipopanaꞌu-Na ka ira tonji rombo to nadea ewa sowu,
tonji rombo to daꞌa namala nibila kadeana ewa bone ri talinti.
28 Ninawusaka-Na tonji-tonji etu ri tatongo petoꞌo mpotenda ira,
rintalili tenda-tenda ira.
29 Pade ira nanggoni tonji etu sampe nabosu mpuꞌu,
sabana Alatala nombawai ka ira nuapa to nikonoa ira.
30 Tapi daꞌapa nabasa rara ira nanggoni,
tempo ira dananggoni,
31 naraumo rara Alatala ri jaꞌi ira.
Nipatesi-Na tau-tau to Israel to danamuda bo naroso.
32 Naupa iwetu ira batena nowia silaka,
bo daꞌa nomparasaya powia-powia Alatala to nabaraka.
33 Jadi Alatala nompakaopu katuwu ira ewa nosa nisuupaka,
bo nompakambuku umuru ira ante kasusa to narata ante daꞌa ninjani-njani.
34 Tempo Iꞌa nompatesi sabagia nggari tatongo ira,
etu pade roa-roa ira nantora Iꞌa.
Ira etu natingguli bali nepue ka Alatala.
35 Nitora ira aga Alatala to najadi pekalendu ira,
bo aga Alatala to Neliu Nggalanga to nompakasalama ira.
36 Tapi ira nombabagiu Iꞌa ante tesa-tesa ira,
bo nombadawa Iꞌa.
37 Ira daꞌa natundu ri jaꞌi-Na
bo daꞌa natutu nantuki pojanji-Na.
38 Tapi Alatala batena nompotowe bo nombaampungi ira,
bo daꞌa nompakaropu ira.
Nadea ngganimo Iꞌa nantaꞌamaka rau rara-Na,
bo daꞌapa nisuwuraka-Na pura ka ira.
39 Sabana ninjani-Na ira etu aga manusia biasa,
ira etu aga matuwu sampalai pade mamate, ewa poiri noliu pade mana manjili.
40 Mpanggani-ngganimo ira nangewa Iꞌa,
bo nompakajuꞌa rara-Na tempo ri karawa baina.
41 Nadea ngganimo ira nompesoba Alatala,
bo nompakajuꞌa rara Pue To Neliu Nggagasa to nisomba to Israel.
42 Mana nitora ira kuasa-Na to nabete,
tempo Iꞌa nanggabasaka ira nggariara mpale bali ira.
43 Tempo etu Iꞌa nompowia tandai-tandai to nipogumaa ri Tana Masir,
bo kabaraka-kabaraka ri Bagia Zoan.
44 Binangga-binangga ri setu nibali-Na najadi lei,
sampe ira daꞌa namala nanginu ue etu.
45 Nipakarata-Na lale to nompakasusa to Masir,
bo taraka-taraka to nombagero tana ira.
46 Nipalamba-Na tantadu nanggoni asele ntana ira,
bo mboko nompakaopu asele mpowia ira.
47 Nipakadunggu-Na uja es nompakamate walaa anggur ira,
bo loi betuꞌe to naoko nompakamate kayu-kayu ara.
48 Nipatesi-Na binata-binata to nipiara ira
ante uja es bo kila.
49 Nisuwuraka-Na puramo rau rara-Na ka to Masir,
sampe ira mpuꞌu-mpuꞌu nandasa.
Nipakau-Na salunu malaeka mompakasusa ira.
50 Mana namala nitaꞌamaka-Na rau rara-Na,
mana nipotowe-Na katuwu ira,
tapi nipakaropu-Na ira ante juꞌa mpendai.
51 Nipatesi-Na pura-pura ana langgai ulumbua to Masir,
etumo muli-muli Ham.c
52 Pade nikeniaka-Na todea-Na nalai nggari Tana Masir ewa lunu bimba,
bo nipanuntu-Na ira nolumako noliu ri karawa baina ewa binata nipiara.
53 Nikeniaka-Na ira ante nasalama sampe ira daꞌa naeka,
tapi bali-bali ira nipakatala-Na riara ntasi.
54 Todea-Na nikeni mpaka ri tana-Na mboto to nagasa,
mpaka ri bagia bulu-buluna to niago-Na ante kuasa-Na.
55 Nipopalai-Na pura-pura tau to netoꞌo ri setu nggari ngayo ira,
bo nibagi-bagi-Na tana etu ka todea-Na najadi bagia ira,
pade nipopetoꞌo-Na ira ri sapo-sapo nu bali ira.
56 Tapi to Israel aga nangewa bo nompesoba Alatala to Neliu Nggalanga,
bo daꞌa nantuki Atura-atura-Na.
57 Ira nesapuaka bo daꞌa natutu nantuki Atura Alatala,
nasimbayu ewa totuꞌa ira.
Ira daꞌa namala rasarumaka
nasimbayu ewa pana to nalumbo luina.
58 Ira nompakarau rara-Na
ante nompakoni pue-pue ntanina ri bulu-bulu to nalangana,
pade nompakajuꞌa rara-Na
ante parantau-parantau ira.
59 Nanggita etu narau mpuꞌumo rara Alatala,
sampe to Israel mana nitarima-Na.
60 Iꞌa nompalasi sapo-Na ri ngata Silo,d
etumo Tenda Mpepue-Na to naria ri tatongo manusia.
61 Nipalamba-Na peti pojanji niala nu bali.
Peti to nombagambara kagaya bo kakuasa Alatala namala ka bali-Na.
62 Narau mpuꞌumo rara-Na nanggita todea-Na,
bo nipalamba-Na ira nipatesi ante guma.
63 Kabilasa-kabilasa ira namate riara mposibali,
sampe mana ria langgai to momporongo randoo-randoo ira.
64 Topanggeni-topanggeni agama namate nipatesi bali-bali ira ante guma,
pade rongo-rongo ira daꞌa niwai mantangi ira.
65 Kaopuna nembangumo i PUE ewa tau nembangu naturu,
nasimbayu ewa tadulako nanoto rarana naopu nakalangu ntule.
66 Iꞌa nombadagi pura-pura bali-Na,
bo nompowia tau ntanina nombatege ira.
67 Daꞌa nipelisi-Na suku Efraim,
etumo muli Yusuf,e
68 tapi to nipelisi-Na suku Yehuda,
bo Bulu Sion to nipotowe-Na.
69 Ri setumo nipowia-Na Sapo-Na to nagaya ewa suruga,
nasimbayu ewa dunia to naroo sampe ri kasae-saena.
70 Nipelisi-Na i Daud to natundu ri jaꞌi-Na,
niala-Na i Daud nggari pokarajaana noewu bimba.
71 Nikeni-Na iꞌa nggari petoꞌo poewu bimba to danompatomi,
ala majadi magau manggeniaka to Israel,
todea nu Alatala.
72 Pade i Daud nomparenta ira ante nanoa rara,
bo nanggeniaka ira ante nataꞌu bo nanoto.