Powia Alatala ri tatongo to Israel tempo nggaulu
77
Dade Asaf, nipodade nantuki dade to nosanga ka “Yedutun.”2 Ante suara naroꞌo aku nekakai ka Alatala,
aku nekakai ka Alatala ala Iꞌa mangepe posambayaku.
3 Tempo aku nombarata kasusa,
aku nompakamosu i Pue nerapi tulungi.
Tempo nggawengina daꞌa ria kabasa-basana aku nangonggotaka pale nosambaya,
tapi raraku daꞌa nadota rapakawoe.
4 Tempo aku nantora Alatala, aku nekakai;
ane aku nantondoaka Iꞌa, aga nantambai kalente raraku.
5 Pue nompowia aku daꞌa napisi tempo nggawengina,
nawulesamo raraku, sampe mana namala notesa.
6 Aku nompekiri to nipowia i Pue tempo nggaulu,
bo nantodoaka nuapa to najadi ri mpae-mpae to naliuna.
7 Tempo nggawengina nipekiri-kiriku,a
bo nekutana-tana riara ntaꞌiku,
8 “Iwenu, kami rapoara i Pue sampe ri kasae-saena? Kami mana rapoasi mata-Na?
9 Nalipomo towe-Na to daꞌa ria kaopu-opuna?
Mana rapakadupa-Na janji-Na sampe ri muli nu muli?
10 Mana ria asi mata Alatala?
Mana nompotowe kami sabana rau rara-Na?”
11 Pade nangulimo aku, “Eꞌimo to nompakasusa raraku,
neꞌe-neꞌe sampe Alatala to Neliu Nggalanga mana mantulungi kami.”
12 O PUE, aku madota mantora pura-pura to nipowia-Mu,
aku madota mantora kabaraka-kabaraka-Mu tempo nggaulu.
13 Aku kana mantondoaka pura-pura to nikawia-Mu,
bo mompekiri pura-pura powia-Mu.
14 O Alatala, pura-pura powia-Mu nagasa.
Daꞌa ria to nasimbayu kakuasana ante Komi.
15 Komimo Alatala to nompowia kabaraka,
Komi nompakanoto kuasa-Mu ri tatongo tau-tau ri dunia.
16 Ante karoso-Mu Komi nanggabasaka todea-Mu,
muli Yakub bo Yusuf.
17 O Alatala, tempo nanggita Komi ue najadi naeka,
bo ue ntasi to nandala woꞌu nolalete.
18 Kulimu najadi uja, guntu damo mpapogu ri langi,
bo kila damo mparea ri njumaongu dunia.
19 Guntu-Mu nepogu, kila-kila norea nombawanta dunia,
dunia nolalete bo nogoya.
20 Komi nolumako nantuki balumba,
Komi nombawote tasi, tapi walea-Mu daꞌa natekita.
21 Komi nanggeniaka todea-Mu ewa sambaꞌa topoewu,
ante pekeniaka i Musa bo i Harun.