Posambaya nerapi tulungi tempo natuꞌamo
71
O PUE, aga ri jaꞌi-Mu kupekalendu,neꞌe rapakamba aku rapakaeya.
2 Kabasakamo aku, sabana Komi nanoa,
epemo bo pakasalamamo aku.
3 Komi kana majadi ewa bulu watu petoꞌoku mekalendu,
petoꞌo batena nikalauku.
Nipakatantu-Mu aku rapakasalama,
sabana Komimo petoꞌo pekalenduku to naꞌamana.
4 O Alatala to nisombaku, pakasalamamo aku nggari jaꞌi ntau najaꞌa,
nggari kuasa ntau to nasoa bo daꞌa naꞌasi matana,
5 sabana aga Komimo panjarumakaku.
O Pue ALATALA, Komi to niparasayaku nompamula nggari kakediku.
6 Nompamula nggariara ntaꞌi indoku aga Komi nisarumakaku.
Aku niote nu indoku ante petulungi nggari jaꞌi-Mu,
jadi aku batena mantoiya Komi.
7 Katuwuku najadi jonjo ka tau-tau ntanina,
sabana Komi nanggalendu aku ante karoso-Mu.
8 Aku daꞌa nenonto mantoiya Komi,
bo njaneo ntua nombabila Komi.
9 Neꞌe aku ratijaka Komi tempo matuꞌamo,
neꞌe aku rapalasi tempo mana maroso.
10 Sabana bali-baliku notesa nanguli aku,
tau-tau to madota mompatesi aku mosaongu rara mangewa aku.
11 Ira nanguli, “Nipalasi Alatalamo iꞌa,
kamaimo kita mombaraga bo mombasoko iꞌa,
sabana daꞌa ria to mantulungi iꞌa.”
12 O Alatala, pakamosumo ri jaꞌiku,
O Alatalaku, pakasalisamo mantulungi aku!
13 Pakambamo tau to mangewa aku
rapakaeya bo rapakaropu!
Pakambamo tau to madota mompakasusa aku,
rapongei-ngei bo rapakaeya!
14 Tapi aku batena nanjarumaka Komi,
pade mantambai eona mantambai mantoiya Komi.
15 Njaneo ntua aku kana mantesa powia-Mu to nanoa,
bo powia-Mu nompakasalama todea-Mu,
naupa daꞌa namala kureke kadeana.
16 O Pue ALATALA, aku kana mantoiya powia-Mu to nabaraka,
aku kana mompatolele ka tau aga Komimo to nanoana.
17 O Alatala, nggari kakediku Komi nompatuduki aku,
sampe weꞌi-weꞌi aku batena mantesa powia-Mu to nipogumaa ka tau ntanina.
18 O Alatala, neꞌe rapalasi aku tempo matuꞌa bo mauwamo,
ala aku mamala mantesa kabaraka-Mu ka tau-tau to natuwu weꞌi-weꞌi,
bo mantesa powia-Mu to nipogumaa ka tau-tau to matuwu ri eo nggapurina.
19 O Alatala, kanoa powia-Mu nalanga mpo langi,
pura-pura powia-Mu nipogumaa.
O Alatala, daꞌa ria to nasimbayu ante Komi!
20 Komi nompalamba aku nombarata kasusa to natomona,
tapi Komi kana mompakaroso aku bali,
bo daꞌa mompalamba aku mamate.
21 Komi kana mompajadi aku mantambai rabila ntau,
bo mompakawoe bali raraku.
22 O Alatala to nisombaku, aku kana modade mantoiya Komi ante mokanda gambusu,
sabana Komi batena namala raparasaya.
O Alatala to Neliu Nggagasa to nisomba nto Israel,
aku kana modade mantoiya Komi ante mokanda kacapi.
23 Aku kana mongare madamba-damba,
bo modade mantoiya Komi.
Iwetu woꞌu aku kana modade madamba-damba ri jaꞌi-Mu,
sabana aku nipakasalama-Mu.
24 Njaneo ntua aku kana mompatolele powia-Mu to nanoa,
sabana tau-tau to nompasimbuku nompakasusa aku,
nidagi bo naeya mboto matana.