Posambaya merapi rasi ka magau
72
Dade Magau Salomo.Alatala, patudukimo atura-Mu ka magau.
Pajadimo iꞌa manoa ewa Komi.
2 Perapi iꞌa mantangara todea-Mu ante daꞌa matomo njabingga,
bo mantangara tau-tau to nipandasa ante manoa.
3 Perapi ngata kami mabelo bo masana,
bo pura-pura todea-Mu moinggu manoa.
4 Perapi magau mantangara ante manoa todea to nandasa,
mompakasalama tau to daꞌa nompakule,
bo mompakaropu tau to nompandasa roana.
5 Perapi iwetu kasaena eo bo wula nombawanta dunia,
iwetu woꞌu kasaena magau ante muli-mulina moparenta.
6 Perapi magau mantulungi todeana ewa uja romba nombadunggu karawana,
ewa uja bete nompakabangga tana.
7 Perapi tempo magau moparenta, todeana mombarasai kanoa mpotangarana,
bo mantarima mpengele-ngele to nabelona nggari jaꞌi Alatala sampe ri kasae-saena.
8 Perapi poparentana maluo mpuꞌu nggari pebuluna sampe kasolona,
mompamula nggari Binangga Efrat sampe ri tampa nu dunia.
9 Perapi bali-balina to netoꞌo ri karawa baina matundu ri jaꞌina,
bo motimbakotu ri ngayona.
10 Perapi magau-magau nggari ngata Tarsis bo magau-magau nggari lewuto-lewuto
manggeni pewai ka iꞌa.
Perapi magau-magau nggari Tana Arab bo Etiopiaa
marata mombawai pewai, tandaina ira natundu ri jaꞌina.
11 Perapi pura-pura magau motimbakotu mombabila iꞌa,
bo todea nggari pura-pura ngata majadi batuana.
12 Iꞌa kana mantulungi tau-tau nakasiasi to mekakai merapi tulungi,
bo tau-tau nandasa bo tau-tau to daꞌa ria topantulungi ira.
13 Iꞌa kana mompotowe tau-tau daꞌa nompakule bo tau nakasiasi,
bo mompakasalama tau to nandasa katuwuna.
14 Kana rasalikuna ira nggari pepandasa bo nggari tau nasoa,
sabana katuwu ira neliu nggadea olina ri jaꞌina.
15 Perapi mandate umuru magau!
Perapi bulawa nggari Tana Arab rawai ka iꞌa.
Perapi iꞌa bate-batena raposambaya ntau,
bo bate-batena raperapi ka rasi nggari jaꞌi Alatala.
16 Perapi gando meliu nggadea ri ngatana,
bo madea asele ri bulu-bulu poparentana.
Perapi tanana maboya ewa ri Bulu Libanon,
bo todea ri kotana mantambai kadeana ewa kawoko ri tana.
17 Perapi sanga magau ratora sampe ri kasae-saena,
perapi sangana mantambai matolele.
Perapi todea nggari pura-pura ngata ragane Alatala nasimbayu ewa iꞌa,
perapi pura-pura manusia manguli iꞌa tau nasana.
18 Ratoiyata i PUE, Alatala nto Israel!
Iꞌamo to nompowia nuapa-nuapa to nipogumaa!
19 Ratoiyata sanga-Na to nakuasa sampe ri kasae-saena!
Perapi kuasa bo kagaya-Na matolele ri njumaongu dunia!
Kajadimo iwetu! Amin!
20 Sampe ri seꞌimo posambaya-posambaya i Daud, ana Isai.