Posambaya riara kasusa
69
Dade i Daud ka topopalu dade. Nipodade nantuki dade to nosanga ka “Bunga Bakung.”2 O Alatala, pakasalamamo aku,
sabana ue nepone sampe ri tamboloku.
3 Nanawumo aku riara libo to nandalana,
daꞌa ria petoꞌo polonggo.
Natalamo aku ri ue to nandala,
nipakalome ue nanggabuntu.
4 Nongare-ngaremo aku sampe nalenge, bo nangaumo dorokoku.
Naperemo mataku nantongoraka petulungi Alatalaku.
5 Tau-tau to nawua mata ri jaꞌiku naupa daꞌa ria salaku,
neliu nggadea nggari woꞌo ri balenggaku.
Nadea mpuꞌu tau madota mompatesi aku;
ira najadi baliku nau daꞌa ria saba.
Aku nipasuꞌu manjambei
mbara-mbara to daꞌa niagoku.
6 O Alatala, ninjani Komi kadoyoku,
daꞌa natitabuniaka ka Komi silakaku.
7 O PUE Alatala to Neliu Nggakuasa,
neꞌe sampe pokaingguku mompowia tau-tau to nanjarumaka Komi rapakaeya.
O Alatala to nisomba to Israel,
neꞌe sampe aku mompowia tau-tau to nombasomba Komi rasalai.
8 Aku nipongei baliku sabana nomparasaya Komi,
pade aku nipakaeya ira.
9 Aku najadi ewa tau to sangatana ri jaꞌi sampesuwu-sampesuwuku,
bo ewa tau ntanina ka pura-pura sampesuwu oteku.
10 Toweku ka sapo-Mu, Pue, ewa apu to najela-jela.a
Tesa-tesa ntau nompongei Komi nawela aku woꞌu.
11 Tempo aku nompakaede rara ante notumangi bo napuasa,
aku aga nipongei-ngei ntau.
12 Tempo aku nompake kae karu tandaina nasusa rara,
aku aga nijalili ntau.
13 Aku najadi wua mpantesa ri petoꞌo kasiromu ntau dea,
bo tau-tau nalangu nodade nompongei-ngei aku.
14 Tapi O PUE, aku nosambaya ri jaꞌi Komi
tempo aku nikonoa Komi.
Sonomo aku ante towe-Mu to daꞌa ria kaopu-opuna,
tulungimo aku sabana Komi batena nompotowe aku.
15 Soreakamo aku nggariara libo ala aku daꞌa matala,
bo nggari ue to nandalana.
Pakasalamamo aku nggari tau-tau to nawua mata ri jaꞌiku.
16 Neꞌe rapakamba aku rapakalome ue nanggabuntu,
neꞌe rapakamba aku matala riara ntasi,
atau matetana riara dunia ntomate.
17 O PUE, sonomo aku,
sabana Komi nabelo bo batena nompotowe aku.
Pariarantaꞌimo aku,
sabana Komi mpuꞌu-mpuꞌu naꞌasi mata.
18 Neꞌe metabuni nggari jaꞌi batua-Mu eꞌi,
pakasalisamo mantulungi aku, sabana nandasamo aku.
19 Kamaimo mompakasalama aku,
kabasakamo aku nggari jaꞌi bali-baliku.
20 Ninjani Komi iwenu aku nipongei, nipakaeya, bo nisalai nu baliku.
Ira pura-pura naria ri ngayo-Mu.
21 Pesalai ira nompakalente raraku,
sampe aku naopu rara.
Nisarumakaku maria tau maꞌasi mata,
tapi daꞌa ntoto naria.
Nieloku tau mompakawoe raraku,
tapi daꞌa nirataku.
22 Aku aga niwai ira ka panggoni napaꞌi ewa racu,
bo tempo nabai tamboloku aku niwai ira ka panginu napoi ewa cuka.
23 Palambamo ira rasuku Alatala tempo manggoni bau nipesomba ka Alatala,
bo palambamo ira matesoꞌo, ewa tonji nisoꞌo talia, tempo ira nantuki posusa posukuru.
24 Palambamo mata ira maburo sampe daꞌa mamala mekita,
pakambamo kope ira batena majuꞌa.
25 Popokitamo rau rara-Mu ka ira,
palambamo belisi rara-Mu to newoya-woya mawela ira.
26 Pakambamo petoꞌo potenda ira makalinoa,
bo tenda-tenda ira mana rapetoꞌo ntau.
27 Kawiamo pura-pura etu sabana ira nompandasa tau-tau to nisuku-Mu,
bo nantesa tau-tau to nipandasa-Mu.
28 Pakambamo kasala ira mantambai kadeana sampe ira masipato rasuku;
neꞌe manguli ira daꞌa nasala.
29 Perapi sanga ira rapakalipo nggari Buku Katuwua,b
neꞌe ratulisi sanga ira riara buku ntodea-Mu.
30 Tapi aku eꞌi nipandasa bo najuꞌa.
O Alatala, tulungimo aku bo kalendumo aku.
31 Aku kana modade bo mantoiya Alatala,
bo mompakabete sanga-Na ante dade posukuru.
32 Neliu nggabelopa pura-pura etu ka i PUE pade binata rapesomba,
ewa japi tuama to nabetena.
33 Nanggita Pue nantulungi aku tau-tau nipandasa kana madamba rara,
bo tau-tau nepue ka Alatala kana maroso bali pomparasaya ira.
34 Sabana i PUE nangepe posambaya tau nakasiasi,
bo daꞌa nanggalinga todea-Na to nitarunggu.
35 Waikamo langi, dunia, tasi bo pura-pura to natuwu riarana,
mantoiya Iꞌa.
36 Sabana Alatala kana mompakasalama pue ngata Yerusalem nggari bali ira,
bo mombabangu mpanjili kota-kota ri bagia Yehuda,
ala todea i PUE metoꞌo ri saꞌa,
bo maroo ri tana etu.
37 Muli-muli ntau nomparasaya i PUE
kana mombarata bagia ri setu;
tau-tau to nompotowe i PUE
kana metoꞌo ri saꞌa.