Dade padagi
68
Dade i Daud ka topopalu dade. Dade nantoiya Alatala.2 Perapi Alatala marata mompakagaro bali-Na,
perapi tau-tau to nomporau Iꞌa nangowa nalai nggari jaꞌi-Na.
3 Ewa sumoa nalipo nitawui mpoiri,
ewa lili nagonu nikoni apu,
iwetumo tau najaꞌa naropu ri ngayo Alatala.
4 Tapi tau-tau nanoa nosukuru ri ngayo Alatala,
ira nadamba-nadamba bo nasana rara.
5 Podademo mantoiya sanga Alatala,
pakasadiamo jala ka Iꞌa to nesawi kulimu.a
Sanga-Na i PUE,
pakadamba-dambamo ri ngayo-Na!
6 Alatala netoꞌo ri sapo-Na to nagasa;
Iꞌamo uma nu ngana pailu bo topanjaliku pura-pura tobalu besi.
7 Tau to natuwu njambaꞌana,
nipakasaongunjapo-Na ante tau ntanina,
bo nikabasaka-Na tau nitarunggu
sampe ira natuwu nasana.
Tapi tau-tau to nangewa Iꞌa,
kana metoꞌo ri tana ngau.
8 O Alatala, tempo Komi nanggeniaka todea-Mu
noliu ri karawa baina,
9 dunia nogoya bo uja nggari langi nadunggu ri ngayo-Mu,
sabana karata Alatala Sinai,b
etumo Alatala to nisomba to Israel.
10 O Alatala, nipakadunggu-Mu uja to neliu nggaromba,
bo tana-Mu to nangau nipakabangga-Mu bali,
11 pade todea-Mu netoꞌo ri saꞌa.
O Alatala, nggari kabelo nu rara-Mu,
Komi nompakagana katuwu ntau nakasiasi.
12 Pue notesa,
bo nadea mpuꞌu tau to nompatolele tesa etu.
13-14 Magau-magau bo tantarana nasasinta-sinta nangowa nalai!
Besi-besi ri sapo nombabagi-bagi mbara-mbara to niago riara mposibali.
Naupa daꞌa nadea nalau nosibali,
todea nu Alatala kana padagi.c
15 Tempo magau-magau nipakagaro Alatala to Neliu Nggakuasa ri saꞌa,
nanaꞌumo salju ri Bulu Salmon.
16 Bulu Basan bulu to daꞌa ria kasimbayuna,
bulu to nadea bungguna to nalanga.
17 Nokuya komi to nepue ri Bulu Basan,
nasiriati nanggita tau to nepue ri Bulu Sion,
bulu to nipelisi Alatala nipetoꞌo-Na?
Kakonona bulu etu kana rapetoꞌo Alatala sampe ri kasae-saena.
18 Kareta mposibali Alatala nonjobu-njobu, daꞌa namala nibila kadeana.
Alatala narata nggari Bulu Sinai bo nesua ri Sapo-Na to nagasa.
19 Neponemo Iꞌa mpaka ri petoꞌo to nalangana,
nanggeni tau-tau to nidagi-Na.
Iꞌa nantarima pesomba nggari jaꞌi manusia,
bo nggari jaꞌi topeꞌewa woꞌu.
Pade PUE Alatala naroo netoꞌo ri saꞌa.
20 Toiyamo i PUE, sabana Iꞌamo to nompakasalama kita;
eo-eo Iꞌa nanjumbuaka panggenita.
21 Iꞌamo Alatala to nompakasalama kita,
PUEmo to nanggabasaka kita nggari kamatea.
22 Tapi natantumo Alatala kana mompakarege balengga bali-bali-Na,
etumo tau-tau batena natuwu riara silaka.
23 Nangulimo Pue, “Umba komi todea-Ku, Aku kana manggeni mpanjili balimu nggari Bulu Basan,
bo nggari tasi to nandala,
24 ala komi mamala mombalonggo-longgo lei ira,
bo asu-asumu mabasa mombajila lei ira.”
25 O Alatala, pura-pura tau nanggita Komi nolumako ri tatongo ntau dea.
Ira nanggita Komi Alatalaku, magauku, nalau mpaka ri Sapo-Mu to nagasa, sabana Komi padagi.
26 Ri koluna naria topodade,
bo ri purina naria topokanda kacapi.
Ri tatongona naria randoo-randoo topokanda rabana.
Ira pura-pura nodade ante nanguli,
27 “Umba komi pura-pura muli Yakub, toiyamo Alatala,
toiyamo i PUE ri tatongo kasiromu ntodea-Na!”
28 Ri setu suku Benyamin, muli nggari ana Yakub kaopu, nolumako ri koluna,
pade nituki topanggeniaka suku Yehuda,
bo topanggeniaka suku Zebulon bo suku Naftali.
29 O Alatala, popokitamo kuasa-Mu,
pakanotomo karoso-Mu ewa nipowia-Mu ka kami bopia.
30 Magau-magau kana manggeni pesomba ka Komi,
ri Sapo-Mu ri Yerusalem.
31 Ontiakamo tau-tau to Masir,
to nasimbayu ewa binata-binata bete ranggawoko.
Ontiakamo tau-tau to Masir to nasimbayu ewa lunu japi ante ana-anana.
Ira aga nosipandasa ala mombarata salaka.
Pakagaromo tau-tau to nompokono nosibali.
32 Pangga-pangga bete kana marata nggari Tana Masir;
tau-tau to Etiopia kana masalisa-lisa manggeni pesomba ka Alatala.
33 Umba komi todea ri pura-pura poparenta ri dunia, podademo ka Alatala,
toiyamo i PUE!
34 Toiyamo Iꞌa to nesawi kareta to noliu ri langi,
etumo langi to naria mamimo nggari lamba pamulana.
Petalingamo! Iꞌa nompopoepe suara-Na,
to nepogu ewa guntu to neliu nggagai.
35 Pangakumo kuasa nu Alatala!
Kabete kuasa-Na natekita ri tatongo to Israel,
langi nompopokita karoso-Na.
36 Nabaraka mpuꞌu Alatala
tempo Iꞌa nesuwu nggari Sapo-Na to nagasa.
Alatala to nisomba to Israel nompowia todea-Na naroso bo nakuasa.
Ratoiyata Alatala!