Mazmur 67

Dade posukuru

Dade ka topopalu dade. Nipodade ante nokanda kacapi. Dade nantoiya Alatala.

2 Perapi Alatala maꞌasi mata-Na bo mombagane kita,

perapi Iꞌa mombawai rasi ka kita ante masana rara-Na,

3 ala dota-Na ranjani ntau ri njumaongu dunia,

bo kuasa-Na mompakasalama ranjani pura-pura manusia.

4 O Alatala, perapi tau nggari pura-pura ngata mantoiya Komi,

perapi pura-pura manusia mosukuru ri jaꞌi-Mu.

5 Perapi pura-pura tau mongare madamba-damba,

bo modade ante kasana rara,

sabana Komi noparenta ante nanoa,

bo nanggeniaka pura-pura todea ri dunia.

6 O Alatala, perapi todea nggari pura-pura ngata ri dunia mantoiya Komi,

perapi pura-pura manusia mosukuru ri jaꞌi-Mu.

7 Alatala to nisombata nombagane kita,

sampe nariamo asele ntanata.

8 Alatala nombawai rasi ka kita;

perapi pura-pura manusia ri dunia mekou ri jaꞌi-Na.