Dade posukuru
66
Dade ka topopalu dade. Dade nantoiya Alatala.Umba komi ri njumaongu dunia,
toiyamo Alatala ante madamba-damba!
2 Podademo mantoiya sanga-Na to nakuasa!
Bila bo toiyamo Iꞌa ante dade-dade!
3 Ulimo ka Iꞌa,
“Nabaraka mpuꞌu powia-Mu!
Madota daꞌa madota bali-Mu kana mekou ri jaꞌi-Mu,
sabana nabete mpuꞌu kuasa-Mu.
4 Pura-pura manusia ri dunia notimbakotu nombasomba Komi,
ira nodade nantoiya Komi,
ira nodade nantoiya sanga-Mu.”
5 Kamai kitamo nuapa to nipowia Alatala,
nabaraka mpuꞌu powia-Na ri tatongo manusia.
6 Tasi nibali-Na najadi tana nangau,a
bo totuꞌata nggaulu nombawote binangga ante nojala nggada.b
Jadi kamaimo kita madamba-damba sabana powia-Na.
7 Iꞌa noparenta ante kuasa-Na,
sampe ri kasae-saena.
Nipariarantaꞌi-Na pura-pura manusia ri dunia,
ala topesapuaka neꞌe mompakalanga rara ira.
8 Umba komi todea nggari pura-pura ngata, toiyamo Alatala to nisomba kami,
popoepemo ka tau-tau ntanina dade-dade mantoiya Iꞌa.
9 Iꞌa to nombajagai kami ala batena matuwu,
bo daꞌa nompalamba kami nidagi.
10 O Alatala, Komi nombauji bo nompakagasa kami,
ewa tau nompalabu salaka riara apu ala manggita daꞌa ria galona.
11 Nipakamba-Mu kami nanawu riara kasusa,
niwai-Mu ka kami panggeni ntomo.
12 Nipalamba-Mu kami nilonggo-longgo nu bali;
nipakamba-Mu kami nombarata kasusa to neliu nggajaꞌana.c
Tapi weꞌi-weꞌi kami nikeni-Mu
mpaka ri petoꞌo to nasana.
13 Aku kana manggeni pesomba to nitunu mpaka ri Sapo-Mu,
bo mompakadupa janjiku ri jaꞌi-Mu,
14 etumo janji to niuliku
tempo aku riara kasusa.
15 Aku kana mantunu binata-binata to naboyana rapesomba ka Komi,
etumo bimba pomawa, japi bo towau tuamana.
Pade sumoana kana meore mpaka ri jaꞌi-Mu
mompakasana rara-Mu.
16 Umba komi to natundu ri jaꞌi Alatala, kamai epemo tesaku.
Aku kana mantesa nuapa to nipowia Alatala ri jaꞌiku.
17 Ante sumbaku aku nekakai merapi tulungi ka Iꞌa,
bo aku nodade mantoiya Iꞌa.
18 Ane rapana maria nia jaꞌa riara ntaꞌiku,
natantumo i Pue daꞌa madota mangepe posambayaku.
19 Tapi nipetalinga-Namo pomperapiku,
nipariarantaꞌi-Na posambayaku.
20 Aku nantoiya Alatala sabana daꞌa nipoara-Na pomperapiku,
bo daꞌa nipakakawao-Na towe-Na to daꞌa ria kaopu-opuna nggari jaꞌiku.