Dade bo posukuru ka Alatala
65
Dade i Daud ka topopalu dade.2 O Alatala, Komimo to masipato ratoiya ri Kota Sion,a
bo ri jaꞌi-Mu kami mombawai pesomba to nijanji kami ka Komi. b
3 Komimo to nantarima posambaya kami,
bo pura-pura manusia kana marata mombasomba Komi.
4 Natomo mpuꞌu silaka-silaka kami,
tapi Komi nombaampungi kami.
5 Nasana mpuꞌumo tau to nipelisi-Mu
bo nipokio-Mu metoꞌo ri Sapo-Mu.
Kami kana rapakasana ante mpengele-ngele to nabelona,
to nitarima kami ri Sapo-Mu, petoꞌo-Mu to nagasa.
6 O Alatala, Topompakasalama kami,
ante powia-powia-Mu to nabaraka bo nanoa Komi nombasono kami.
Komimo panjarumaka pura-pura tau ri njumaongu dunia,
sampe ri tasi to nakawaona.
7 Komimo to nompajadi bulu-bulu ante karoso-Mu,
ala mompopokita kuasa-Mu to neliu nggabete.
8 Nipakalino-Mu pogu balumba riara ntasi,
etumo pogu balumba-balumba to nanggaboba,
bo nipopenonto-Mu kagado ntodea nggari pura-pura ngata.
9 Pura-pura tau ri dunia
naeka nanggita powia-powia-Mu to nabaraka.
Nggari pebuluna sampe ri kasolona,
nipowia-Mu pura-pura manusia nowoo nadamba-damba.
10 Tana ri dunia nipariarantaꞌi-Mu bo niwai-Mu asele to nadea;
tana etu nipakaboya-Mu sampe nadea mpuꞌu aselena.
Binangga-binangga-Mu naponu pura ante ue;
bo nipakasadia-Mu gando ka manusia ri dunia.
Iwetumo to nipowia-Mu.
11 Nipakadunggu-Mu uja ri jala mpajeko,
nipakabangga-Mu tubi-tubi ntana.
Nirege-Mu tubi-tubina etu ante uja,
bo nipowia-Mu tuja-tuja nosulu bo natuwu naboya.
12 Nggari kabelo-Mu, niwai-Mu asele ntana to neliu nggadea butu-butu mpae.
Ri umba-umba nikalau-Mu, niwai-Mu asele to neliu nggadea.
13 Naria kawoko-kawoko naboya bo naramata ri karawana,
bulu-bulu nipakaramba sampe nadamba-damba ewa manusia.
14 Bulu rapa naponu ante towau bo bimba,
lemba-lembana naponu ante gando.
Pura-pura etu nongare nadamba-damba bo nodade ewa manusia.