Posambaya merapi rakalendu nggari nia ntau najaꞌa
64
Dade i Daud ka topopalu dade.2 O Alatala, epemo posambayaku tempo aku nasusa,
jagaimo katuwuku nggari bali to nompakawiora raraku.
3 Kalendumo aku nggari sintuwu ntau najaꞌa,
nggari kagado tau-tau to nowia kajaꞌana.
4 Ira nompakataja jila ira ewa guma,
bo nombasuwuraka tesa-tesa nataja ewa mata wila.
5 Nggari petoꞌo to daꞌa nikita, ira nombapana tau daꞌa ria salana;
sampegoli ira nombapana tau ante daꞌa ria ekana.
6 Ira daꞌa nabasa-basa nonia jaꞌa,
ira nasintuwu nantaꞌa talia nggalino ala mompakasusa tau.
Niuli ira, “Daꞌa ria tau to nanggita.”
7 Ira nonia mowia anu jaꞌa;
niuli ira, “Nasadiamo nia kami!”
Rara ntaꞌi bo pekiri manusia daꞌa namala niboto ntau,
ewa ue to nandala daꞌa namala niukuru kandalana.
8 Tapi Alatala kana mombapana ira,
sampegoli nabelamo ira.
9 Ira rapakasusa tesa ira mboto;
pura-pura tau to manggita kana mombatege ira.
10 Pura-pura tau kana maeka,
pade mompatolele powia Alatala.
Ira kana mantondoaka nuapa to nikawia-Na.
11 Jadi tau-tau to natundu ri jaꞌi Alatala kana madamba-damba
nanggita nuapa to nipowia i PUE;
bo ira kana mekalendu ri jaꞌi-Na.
Pura-pura tau to nanoa kana mantoiya Iꞌa.