Nalentora ka Alatala
63
Dade i Daud tempo iꞌa naria ri karawa baina ri bagia Yehuda.2 O Alatala, Komimo Alatala to nisombaku, aku nangelo Komi.
Aga Komi nipolentoraku.
Katuwuku mpuꞌu-mpuꞌu nomparaluu Komi,
nasimbayu ewa tana nabai bo nangau nomparaluu ue.
3 Nikitakumo Komi ri Sapo-Mu,
nikitaku karoso bo kagaya-Mu.
4 Aku kana mantoiya Komi,
sabana towe-Mu to daꞌa ria kaopu-opuna neliu nggabelopa pade katuwuku.
5 Jadi aku kana mantoiya Komi sampe kaopu katuwuku,
aku kana mangonggotaka paleku mosambaya ka Komi.
6 Aku kana mantoiya Komi ante madamba-damba,
sabana Komi nompakasau raraku,
nasimbayu ewa panggoni to narasa.
7 Tempo aku naturu Komi nitoraku;
njambengi ntua Komi nitondoakaku,
8 sabana Komimo Topantulungi aku.
Ri kele nggapi-Mu aku modade madamba-damba.
9 Aku naroo nomparasaya Komi,
pale nggana-Mu nompakaroso aku.
10 Tapi tau-tau to nompasimbuku mompatesi aku,
kana mesua ri dunia ntomate.
11 Ira kana rapatesi ntau ante guma,
bo watabaku ira majadi panggoni asulako.
12 Tapi magau kana madamba-damba sabana petulungi Alatala.
Tau-tau to nojanji ante nanguli sanga Alatala kana mantoiya Iꞌa,
tapi sumba ntopodawa kana ralamu.