Nasana mpuꞌu namosu ante Alatala \pv
62
Dade i Daud ka topopalu dade. Nipodade nantuki dade to nosanga ka “Yedutun.”
2 Aga namosu Alatala raraku nasana,
aga Iꞌamo to nompakasalama aku.
3 Aga Iꞌamo petoꞌo pekalenduku, Iꞌamo to nompakasalama aku.
Iꞌamo ewa tembo to naroso kupekalendu sampe aku daꞌa nolengga.
4 Sakuyapa kasaena komi pura-pura mombasuaki bo mompasimbuku mompatesi aku,
naupa aku ewa tembo to nakabeimo,
ewa leru ntora madungga?
5 Komi aga madota mompakanawu aku nggari pekatokoku to nalanga,
bo nompokono nodawa.
Ante sumbamu komi nerapi rasi nggari jaꞌi PUE ka tau ntanina,
tapi nggariara ntaꞌimu komi nejanjiaka.
6 Aga namosu ante Alatala raraku nasana,
sabana aga Iꞌamo to nisarumakaku.
7 Aga Iꞌamo petoꞌo pekalenduku, Iꞌamo to nompakasalama aku.
Iꞌamo ewa tembo to naroso kupekalendu sampe aku daꞌa nolengga.
8 Alatala to nompakasalama aku bo nompowia aku nibila,
Iꞌamo to nanggalendu, nompakaroso bo nombajagai aku.
9 Umba komi todeaku, parasayamo Alatala ri butu-butu tempo!
Tesa ka Iꞌa puramo isi rara ntaꞌimu,
sabana Iꞌa petoꞌo pekalenduta.
10 Tau to naede katuwuna aga ewa nosa nisuupaka,
bo tau to nalanga katuwuna daꞌa ria batuana.
Ane ratimba ira mpuꞌu-mpuꞌu nangaꞌa,
neliu nggangaꞌa nggari nosa nisuupaka.
11 Neꞌe manjarumaka asele pebagiu,
bara manjarumaka mbara-mbara to niago.
Pade ane kakalumanamu mantambai,
neꞌe aga ri saꞌa pompekirimu.
12 Nadea ngganimo aku nangepe Alatala notesa,
aga Iꞌamo puꞌu nu kuasa,
13 pade aga Iꞌamo puꞌu towe to daꞌa ria kaopu-opuna.
O Pue, Komi nombabalasi butu mbaꞌa tau,
nantuki pokaingguna.
tgl 22 juni 2012