Posambaya merapi tulungi mantingayo bali
60
Dade ka topopalu dade. Nipodade nantuki dade to nosanga ka “Posabi Bunga Bakung.” Dade pepatuduki Daud to nitulisina 2 tempo iꞌa nangewa tau to Aram nggari Mesopotamia bo Zoba, bo tempo Yoab natingguli naopu nompatesi sampulu ronjobu tau to Edom ri Lemba Gara.3 O Alatala, Komi nompalasi kami,
bo nompakamba kami nidagi.
Naraumo rara-Mu ri jaꞌi kami;
tapi weꞌi-weꞌi pakabelo balimo katuwu kami.
4 Dunia nigagoya-Mu sampe nabingga.
Pakabelomo to nabinggana, sabana dunia danogoya.
5 Nipakamba-Mu todea-Mu nombarasai kasusa to nabetena,
bo nipowia-Mu ira ewa tau nalangu nanginu tule mpadungga-dungga.
6 Tapi tau to natundu ri jaꞌi-Mu nipopatora-Mu,
ala ira neꞌe radagi nu bali.
7 Pakasalamamo kami ante kuasa-Mu, sonomo pomperapi kami,
ala masalama todea to nipotowe-Mu.”
8 Notesamo Alatala nggari petoꞌo-Na to nagasa,
“Aku madota madamba-damba bo mombabagi Tana Sikhem;
Aku madota mombaukuru bo mombabagi Lemba Sukot.
9 Tana Gilead bo Tana Manasye Akumo puena.
Tana Efraim ewa songgo waja nanggalendu balengga-Ku,
bo Tana Yehuda ewa lembau to nipake magau noparenta.a
10 Tana Moab petoꞌo powukoꞌi kada-Ku,
bo Tana Edom pantijaka sapatu-Ku,b
tandaina pura-pura etu Akumo puena.
Pade Aku nongare nadamba-damba sabana nombadagi Tana Filistin.”
11 O Alatala, isema to manggeni aku mpaka ri Tana Edom?
Isema mombanini aku mpaka ri kota to naria tembo pekalendu to narosona etu?
12 O Alatala, natantumo Komi nompalasi kami!
Komi mana madota momporoa tantara kami.
13 Tulungimo kami mombadagi bali kami,
sabana petulungi manusia daꞌa ria gunana.
14 Mosanggani ka Alatala kita kana maroso mpuꞌu.
Iꞌamo to mombadagi bali-balita.