Posambaya merapi rakalendu
59
Dade nitulisi Daud ka topopalu dade tempo Magau Saul nompakau tau nantingawu sapo i Daud ala mompatesi iꞌa. Nipodade nantuki dade to nosanga ka “Neꞌe Rapakaropu.”a2 O Alatalaku, pakasalamamo aku nggari baliku,
kalendumo aku nggari tau to mangewa aku.
3 Kabasakamo aku nggari tau to mowia jaꞌa,
pakasalamamo aku nggari pura-pura topepatesi.
4 O PUE, kitamo ira netingawu mompopea loga mompatesi aku.
Tau-tau naroso nasintuwu mangewa aku,
naupa aku daꞌa noinggu nasala,
atau nowia silaka.
5 Naupa aku daꞌa nasala,
tapi ira nompari-mpari marata mombasuaki aku.
Karatamo mantulungi aku,
bo kitamo katuwuku to nasusa!
6 O PUE Alatala to Neliu Nggakuasa to nisomba nto Israel,
sukumo tau nggari ngata-ngata ntanina.
Neꞌe maꞌasi mata ri jaꞌi ntau najaꞌa,
to nompobalu roana mboto.
7 Tempo ngguwiana ira nanjili bali,
nelolo ewa asu nolumako nantalili kota.
8 Kitamo, ira bate-batena nanguli roa bo nesalai,
tesa-tesa ira nataja ewa guma.
Niuli ira, “Daꞌa ria tau to mangepe tesata!”
9 Tapi PUE, Komi aga nompongiri ira,
Komi nompongei-ngei todea nggari pura-pura ngata.
10 Komimo to nompakaroso aku, Komimo to nisarumakaku.
O Alatala, Komimo petoꞌo pekalenduku.
11 Alatalaku nompotowe aku ante towe to daꞌa ria kaopu-opuna, Iꞌa marata mantulungi aku.
Iꞌa mompaloga aku manggita bali-baliku radagi.
12 O Pue, Topanggalendu kami, neꞌe rapatesi ira,
ala todeaku daꞌa manggalinga iwenu Komi nombasuku bali.
Pakemo kuasa-Mu mompoposimpotatare ira,
bo dagimo ira.
13 Nggari tesa ira nanotomo ira tau nasilaka.
Palambamo ira manawu ante kasombo ira mboto,
sabana ira nompokono nodawa bo nejanjiaka.
14 Patesimo ira ante rau rara-Mu!
Pakaropumo ira sampe maopu,
ala ranjani ntau Alatalamo to nomparenta to Israel,b
bo pura-pura tau ri dunia.
15 Tempo ngguwiana ira nanjili bali,
nelolo ewa asu nantalili kota.
16 Ira nanjayo-njayo nangelo panggoni,
bo nanggarau ane daꞌa nabosu.
17 Tapi aku kana modade mantesa kuasa-Mu.
Mpadondo-mpadondo aku kana modade ante madamba,
sabana towe-Mu daꞌa ria kaopu-opuna.
Komimo petoꞌo pekalenduku.
Komimo petoꞌo pekalenduku tempo aku nirata kasusa.
18 O Alatala to nompakaroso aku, kupodade dade mantoiya Komi,
sabana Komimo petoꞌo pekalenduku;
bo towe-Mu daꞌa ria kaopu-opuna.