Posambaya merapi Alatala mombabalasi tau najaꞌa
58
Dade i Daud ka topopalu dade. Nipodade nantuki dade to nosanga ka “Neꞌe rapakaropu.”2 E komi tau-tau to nakuasa,
nanoamo komi nombabutusi parakara,
nanoamo komi nantangara sanggamanusiamu?
3 Daꞌa! Komi batena nonia to nadenggona,
bo komi nowia to najaꞌa ri dunia eꞌi!
4 Tau-tau najaꞌa nasala njala mamimo nggariara ntaꞌi indona,
dako nesuwu ira nodawa bo nasalanjalamo.
5 Tesa ira najaꞌa ewa bisa nu ule,
ira netibongo ewa ule wuri to nombalamu talingana,
6 to daꞌa nangepe suara ntau to nabiasa nanjoko ule,
atau suara ntau to nataꞌu nompoponondo ule.
7 O PUE Alatala, pakalentemo baliku to naroso ewa singa.
Pakakotomo ngisi pesokona!
8 Palambamo ira malipo ewa ue to naoti,
perapi ira malele ewa kawoko ri wiwi jala.
9 Palambamo ira majadi ewa woku to nagonu najadi luu,
ewa ngana namate nggariara daꞌapa nanggita eo.
10 Waikamo ira sampenjani mamate
ewa rangga nangau nikoni nu apu daꞌapa kura a nipakapane.
11 Nanggita tau najaꞌa nisuku, tau nanoa kana madamba-damba.
Madamba rara ira topomparasaya tempo tau najaꞌa nisuku Alatala.
12 Tau kana manguli, “Mpuꞌu-mpuꞌu naria tambo ka tau to nanoa.
Mpuꞌu-mpuꞌu naria Alatala to notangara ri dunia ante nanoa.”