Posambaya merapi tulungi
57
Dade nitulisi Daud ka topopalu dade tempo iꞌa nalai mpaka riara bololia sabana niraga Magau Saul. Nipodade nantuki dade to nosanga ka “Neꞌe mompakaropu.” a2 O Alatala, poasi matamo aku, poasi matamo aku,
sabana aga ri jaꞌi-Mu kupekalendu.
Ri wayo kapi-Mu kupekalendu,
sampe maopu kasusa etu.
3 Aku nekakai ka Alatala to Neliu Nggalanga,
aku nekakai ka Alatala to nompakaopu kasusaku.
4 Nggari suruga Iꞌa nombasono aku bo nompakasalama aku.
Iꞌa nompakaeya tau-tau to nompandasa aku.
Alatala nompopokita ka aku Iꞌa namala raparasaya mompakadupa janji-Na,
bo batena nompotowe aku ante towe-Na to daꞌa ria kaopu-opuna.
5 Aku nitiku nu baliku,
ira ewa singa topanggoni manusia.
Ngisi ira ewa tawala bo wila,
jila ira ewa guma to nataja.
6 O Alatala, popokitamo kakuasa-Mu ri langi,
bo kagaya-Mu to nipogumaa ri njumaogu dunia.
7 Baliku nantaꞌa tandoko ala mombasoꞌo aku;
mpuꞌu-mpuꞌu naopumo raraku.
Ira nombakae lowu ri jalaku ala mompakanawu aku,
tapi ira mboto to nanawu riarana.
8 O Alatala, aku mpuꞌu-mpuꞌu nomparasaya, aku mpuꞌu-mpuꞌu nomparasaya,
aku madota modade bo mantoiya Komi.
9 Aku kana membangu modade bo mokanda gambusu bo kacapi!
Aku kana membangu daꞌapa mebulu eo.
10 O Pue, aku madota mosukuru ri jaꞌi-Mu
ri tatongo tau-tau nggari ngata-ngata ntanina.
Aku madota modade mantoiya Komi
ri tatongo pura-pura manusia.
11 Sabana kabete towe-Mu to daꞌa ria kaopu-opuna sampe ri langi.
Komi namala raparasaya mompakadupa janji-Mu,
bo kareba etu natolele ri umba-umba sampe ri kulimu.
12 O Alatala, popokitamo kuasa-Mu neliu nggalanga nggari langi,
bo pakanotomo ri njumaongu dunia Komimo to nakuasa bo nipogumaa.