Riara kasusa aku nanjarumaka Alatala
56
Dade nitulisi Daud ka topopalu dade tempo iꞌa nisoko tau to Filistin ri ngata Gat. Nipodade nantuki dade to nosanga ka “Tonji banggebodo to nekalino ri petoꞌo nakawao.” a2 O Alatala, poasi matamo aku, sabana aku nipandasa bali-baliku.
Njaneo ntua ira nesuaki bo nompatundu aku.
3 Njaneo ntua bali-baliku nompandasa aku;
nadea mpuꞌu tau nangewa aku ante nalanga rara.
4 Tempo aku naeka rara,
aku netidombo ri jaꞌi-Mu.
5 Aku nantoiya Alatala sabana Iꞌa nompakadupa janji-Na,
aku nanjarumaka Alatala, jadi mana ria eka raraku.
Daꞌa ria to mamala rapowia manusia ri jaꞌiku.
6 Njaneo ntua baliku nompakagado urusaku,
ira bate-batena nonia jaꞌa ri jaꞌiku.
7 Ira nasintuwu netabuni,
nombalele mata powiaku
nangelo loga mompatesi aku.
8 O Alatala, daꞌa ntoto mamala tau to nowia kajaꞌana rapakasalama!
Pakaropumo ira ante rau rara-Mu!
9 Ninjani-Mu kadea kasusaku;
nipariarantaꞌi-Mu ue mataku to natiti.
Natantumo etu pura nitulisi riara buku-Mu.
10 Tempo aku mekakai merapi tulungi ri jaꞌi-Mu,
baliku kana radagi,
sabana niparasayaku Alatala batena nosabingga ka aku.
11 Aku nantoiya i PUE Alatala,
sabana nuapa to nijanji-Na.
12 Iꞌa nisarumakaku, jadi aku daꞌa naeka.
Manusia daꞌa ntoto mamala mowia nuapa-nuapa ri jaꞌiku.
13 O Alatala, aku kana mompakadupa janjiku ri jaꞌi-Mu,
bo mombawai pesomba posukuru ka Komi.
14 Sabana Komimo to nantulungi aku sampe aku daꞌa namate;
Komimo to nombajagai lempaku sampe aku daꞌa natipasunu.
Jadi aku mamala matuwu mamosu ante Alatala,
riara reme-Na to nombawai katuwua ka manusia.