Posambaya merapi tulungi mantingayo bali
55
Dade pepatuduki Daud ka topopalu dade. Nipodade ante nokanda kacapi.2 O Alatala, epemo posambayaku,
neꞌe mantubengo aku.
3 Pariarantaꞌimo bo sonomo aku.
Nawulesamo raraku sabana nakini bo nagero pekiriku
4 nangepe pongare nu bali-baliku,
bo pepandasa tau najaꞌa.
Sabana ira nompakasusa katuwuku,
bo nangewa aku ante rau rara.
5 Nawulesa mpuꞌumo raraku,
nawiora mpuꞌu raraku mantingayo kasusa to mepakamate.
6 Naeka bo nolaletemo aku,
bo nawiora mpuꞌu raraku.
7 Nipekiriku, “Ane rapana aku nokapi ewa tonji banggebodo,
aku kana membua mangelo petoꞌo to nalino.
8 Aku kana membua makawao mpuꞌu,
bo metoꞌo ri karawa baina.
9 Aku kana mompari-mpari mangelo petoꞌo pekalendu,
makawao nggari bara bo poiri bete.”
10 O Pue, pakaingumo bali-baliku,
pakagadomo potesa ira,
sabana nikitaku ri kota naria tau nepandasa bo nosibaga.
11 Eo wengi ira nolumako ri bunggu tembo nantalili kota,
nowia jaꞌa bo nompakasusa tau.
12 Ri umba-umba ira nowia gado;
ri kasiromu tau dea batena naria pepandasa bo pebagiu.
13 Ane rapana baliku to mombasalai aku,
damamalapa aku mosabara.
Ane rapana baliku to manjauru aku,
damamalapa aku metabuni nggari jaꞌina.
14 Tapi komi roaku mboto nowia jaꞌa ri jaꞌiku,
wega rapa to niposinjani beloku.
15 Bopia kita nosimporoa belo,
bo nosanggani-nggani nesua ri Sapo Mpepue ri tatongo tau dea.
16 Palambamo baliku masalisa mamate;
bo palambamo ira masasinta mesua nggatuwu ri dunia ntomate,
sabana naria kajaꞌana riara ntaꞌi bo ri sapo ira.
17 Tapi aku kana mekakai ka Alatala,
pade PUE kana mompakasalama aku.
18 Tempo mpadondona, tongo eo bo tempo ngguwiana aku nongua bo nakadadisi,
pade niepe-Na suaraku.
19 Nipakasalama-Na aku nggari baliku,
naupa nadea mpuꞌu ira nangewa aku.
20 Alatala to noparenta nggari nggaulu sampe ri kasae-saena
kana mangepe posambayaku bo mombadagi ira.
Sabana ira batena nowia jaꞌa,
bo daꞌa naeka ka Alatala.
21 Wegaku etu nompandasa roa-roana,
bo daꞌa nompakadupa janjina.
22 Iꞌa netanara ante tesa-tesa namomi,
tapi patujuna najaꞌa.
Tesana damo nalusu,
tapi netosu ewa guma to niosu.
23 Waimo kakini raramu ri jaꞌi PUE,
pade Iꞌa kana mompiara komi;
tau nanoa daꞌa nipakamba-Na radagi.
24 Tapi Komi, O Alatala, kana mombanawusaka tau najaꞌa etu
riara lowu to neliu nggandala, petoꞌo ntomate.
Topebagiu bo topepatesi
daꞌa mandate umuruna.
Tapi aku batena manjarumaka Komi.