Kajaꞌa manusia
(Mzm. 14 )
53
Dade i Daud ka topopalu dade. Nipodade nantuki dade to nosanga ka “Mahalat.” Dade pepatuduki.2 Todoyo notesa riara ntaꞌina,
“Daꞌa ria Alatala.”
Najaꞌa bo natantoru pokainggu ira,
daꞌa ria to nowia belo.
3 Nggari suruga Alatala nompetiro manusia,
ala manggita ane maria tau to nanoto to nangelo Iꞌa.
4 Tapi pura-pura manusia nasalanjalamo bo najaꞌa,
daꞌa ria to nowia belo, nau kamba sambaꞌa.
5 Nekutanamo Alatala, “Wenumo, daꞌa ninjani tau-tau najaꞌa etu nuapa to nabelona?
Ira nompakaopu todea-Ku ewa tau nadoko nanggoni tibo,
bo daꞌa sanggani nekakai ka Aku.”
6 Ira mpuꞌu-mpuꞌu naeka,
naupa daꞌa ria to nompakaeka ira.
Alatala kana mompatesi bo momposipotatare wuku ntau
to najadi bali todea-Na.
Ira kana radagi bo rapakaeya,
sabana ira nipoara Alatalamo.
7 Perapi Alatala marata nggari Bulu Sion
mompakasalama to Israel!
Tempo Iꞌa mompakabelo todea-Na, muli Yakub kana madamba-damba,
pura-pura to Israel kana mosukuru.