Pesuku ka tau najaꞌa
52
Dade nitulisi Daud ka topopalu dade ala mompatuduki todea Alatala. 2 Nitulisi Daud tempo tau to Edom nosanga ka i Doeg nanguli ka i Saul, “Naratamo i Daud ri sapo Ahimelekh.”a3 E komi tau nasoa, nokuya komi batena nadamba nowia kajaꞌana
ka tau to nipotowe Alatala?
4 E komi topebagiu, komi nonia nompakasusa tau ntanina,
jilamu nasimbayu ewa ladi pegunci to nisampu mpakataja.
5 Nipokonomupa nowia jaꞌa pade nowia belo,
nipodambamupa nodawa pade notesa to nakonona.
6 E komi topebagiu!
Nipokonomu nompakajuꞌa rara tau ntanina ante tesa-tesamu.
7 Tapi komi kana rapakaropu Alatala sampe ri kasae-saena.
Komi kana rakeni mpalai-Na nggari petoꞌomu,
bo rapakalipo-Na nggari tatongo tau-tau natuwu.
8 Nanggita powia Alatala etu, tau nanoa kana maeka,
pade mompongiri komi ante manguli,
9 “Kitamo tau to daꞌa nekalendu ri jaꞌi Alatala,
tapi aga nanjarumaka kakalumanana to neliu nggadea,
bo nompandasa tau ntanina ala mompakaroso iꞌa mboto.”
10 Tapi aku eꞌi natuwu nasana ri sapo Alatala,
ewa sampuꞌu kayu zaitun to naboyana.
Nisarumakaku towe Alatala to daꞌa ria kaopu-opuna,
sampe ri kasae-saena.
11 PUE, aku kana mantoiya Komi sampe ri kasae-saena
sabana nuapa to nipowia-Mu.
Aku kana mompatolele kabelo-Mu
ri ngayo todea-Mu to natutu nomparasaya.