Posambaya merapi raampungi
51
Dade nitulisi Daud ka topopalu dade 2 naopu iꞌa niontiaka Nabi Natan sabana nogau sala ante i Batsyeba.a
 
3 O Alatala, poasi matamo aku ante towe-Mu to daꞌa ria kaopu-opuna,
pakalipomo silakaku ante asi mata-Mu to nabetena.
4 Pegasamo aku nggari pura-pura kasalaku;
pakagasamo aku nggari silakaku.
 
5 Sabana ninjanikumo aku eꞌi tau nasilaka;
silakaku batena nitoraku.
6 Aga ri jaꞌi-Mu, aga ri jaꞌi-Mu aku nasilaka,
nipowiaku to najaꞌa ri mata-Mu.
Jadi Komi nanoa tempo nanguli aku nasala,
Komi masipato mombasuku aku.
7 Mpuꞌu-mpuꞌu aku nasilaka mami nggari pesuwuku,
aku nasilaka mamimo dariara ntaꞌi indoku.
 
8 Komi nompokono rara to nanoa,
Komi nombaboli noto riara ntaꞌiku.
9 Tapasimo silakaku ala aku majadi magasa;
pegasamo aku ala raraku majadi meliu nggabula nggari kapa.
10 Pakambamo aku mangepe kareba to mompakadamba rara,
ala rara to nipakasusa-Mu madamba bali.
11 Neꞌe mana Mutora-tora silakaku,
bo pakalipo puramo kasalaku.
 
12 O Alatala, pakagasamo rara ntaꞌiku,
pa kaboumo raraku ante dota rara matutu mantuki dota Alatala.
13 Neꞌe rapopolai aku nggari ngayo-Mu,
bo neꞌe raala Nosa-Mu to Nagasa nggari jaꞌiku.
14 Pakadamba balimo raraku sabana Komi nompakasalama aku,
wai ka akumo dota rara matundu ri jaꞌi-Mu.
15 Ane iwetu aku kana mompatuduki dota-Mu ka tau-tau to nombaliunaka parenta-Mu,
pade tau-tau nasilaka kana matingguli bali ri jaꞌi-Mu.
 
16 O, Alatala Topompakasalama aku, kabasakamo aku nggari kasala nompatesi tau,
pade ante kadamba raraku aku kana mompatolele ka tau kanoa mpotangara-Mu.
17 O Pue, tulungimo aku motesa-tesa,
ala aku mamala mantoiya Komi.
 
18 O Alatala, pesomba to nisambale daꞌa nipokono-Mu;
naupa kuwai pesomba to nitunu,
daꞌa woꞌu nipokono-Mu.
19 Pesomba to nipokono-Mu aga tau to nanjoso rara nompekiri silakana.
Tau nanjoso rara bo najea nggari silakana daꞌa nipoara-Mu.
 
20 Popokitamo kabelo-Mu ka Kota Sion, b
bangu mpanjilimo tembo-tembo pekalendu ri ntalili Kota Yerusalem.
21 Pade Komi kana mantarima pesomba to masipatona,
etumo pesomba binata to nipalabu mpakaopu.
Pade japi tuama kana rapesomba todea-Mu ri bunggu meja mpesomba-Mu.